అభివృద్ధి చెందుతున్న దేశాల కూటమి బ్రిక్స్ కీలక నిర్ణయం తీసుకుంది.
న్యూఢిల్లీలో జరుగుతున్న శిఖరాగ్ర సమావేశంలో ‘న్యూఢిల్లీ ప్రకటన–2026’కు సభ్యదేశాలు ఏకగ్రీవంగా ఆమోదం తెలిపాయి.
ఏకపక్ష సుంకాలు, వాణిజ్యేతర ఆంక్షలు ప్రపంచ వాణిజ్యాన్ని దెబ్బతీస్తున్నాయని ఆందోళన వ్యక్తం చేస్తూ,
ప్రపంచ వాణిజ్య సంస్థ నిబంధనలకు అనుగుణంగా వాణిజ్య వ్యవస్థ ఉండాలని స్పష్టం చేశాయి.
ఏకపక్ష సుంకాలపై తీవ్ర ఆందోళన
వివిధ దేశాలు ఏకపక్షంగా విధిస్తున్న సుంకాలు, వాణిజ్యేతర చర్యలు
వాణిజ్యాన్ని వక్రీకరిస్తున్నాయని, ప్రపంచ వాణిజ్య సంస్థ నిబంధనలకు విరుద్ధంగా ఉన్నాయని
బ్రిక్స్ దేశాలు పేర్కొన్నాయి. అంతర్జాతీయ చట్టాలకు విరుద్ధంగా ఉండే ఏకపక్ష ఆర్థిక ఒత్తిళ్లను కూడా కూటమి ఖండించింది.
సరిహద్దు చెల్లింపులపై దృష్టి
బ్రిక్స్ దేశాల మధ్య వాణిజ్యాన్ని మరింత సులభతరం చేసేందుకు
సరిహద్దు దాటి జరిగే చెల్లింపులకు ఆచరణాత్మక పరిష్కారాలు కనుగొనే చర్చలను కొనసాగించాలని
ప్రకటనలో సూచించారు. వాణిజ్యం, ఆర్థిక సహకారాన్ని మరింత బలోపేతం చేయడంపై సభ్యదేశాలు దృష్టి పెట్టాయి.
మోదీ ప్రతిపాదనతో ఏకగ్రీవ ఆమోదం
బ్రిక్స్ న్యూఢిల్లీ ప్రకటనను ఆమోదించాల్సిందిగా ప్రధాని నరేంద్ర మోదీ శిఖరాగ్ర సమావేశంలో
అధికారికంగా ప్రతిపాదించారు. సభ్యదేశాల నుంచి ఎలాంటి అభ్యంతరం రాకపోవడంతో
ప్రకటనకు ఏకగ్రీవ ఆమోదం లభించింది.
మేలో న్యూఢిల్లీలో జరిగిన బ్రిక్స్ విదేశాంగ మంత్రుల సమావేశంలో సభ్యదేశాల మధ్య విభేదాల కారణంగా
సంయుక్త ప్రకటన వెలువడని నేపథ్యంలో తాజా ఏకాభిప్రాయం కీలక దౌత్యపరమైన పరిణామంగా భావిస్తున్నారు.
అణు భద్రతపై స్పష్టమైన సందేశం
ప్రపంచవ్యాప్తంగా పెరుగుతున్న ఘర్షణలు, అణు ప్రమాదాలపై కూడా బ్రిక్స్ ఆందోళన వ్యక్తం చేసింది.
అణు భద్రతా ప్రమాణాలు, రక్షణ చర్యలు, భద్రతా వ్యవస్థలు యుద్ధ సమయాల్లోనూ తప్పనిసరిగా కొనసాగాలని
స్పష్టం చేసింది.
‘గ్లోబల్ సౌత్’కు పెద్ద పాత్ర కావాలి
శిఖరాగ్ర సమావేశాన్ని ప్రారంభిస్తూ ప్రధాని మోదీ.. బ్రిక్స్ ఇప్పుడు మరింత పరిపక్వ దశకు చేరుకుందని,
ఐక్యతను కేవలం ప్రకటనలకు పరిమితం చేయకుండా కార్యాచరణలోకి తీసుకురావాల్సిన సమయం వచ్చిందని అన్నారు.
ప్రపంచ సంక్షోభాల సమయంలో గ్లోబల్ సౌత్ ముందువరుసలో ఉంటున్నప్పటికీ,
నిర్ణయాలు తీసుకునే సమయంలో వెనుకబడుతోందని పేర్కొన్న మోదీ.. ఈ పరిస్థితిని మార్చాలని పిలుపునిచ్చారు.
ప్రతి దేశానికి గొంతుక, ప్రతి సభ్యదేశానికి వాటా ఉండే భాగస్వామ్య వ్యవస్థ అవసరమన్నారు.
ఐక్యరాజ్య సమితి భద్రతా మండలి సంస్కరణకు మోదీ పిలుపు
అభివృద్ధి చెందుతున్న దేశాలకు ప్రపంచ నిర్ణయ ప్రక్రియలో మరింత ప్రాతినిధ్యం కల్పించాల్సిన అవసరాన్ని
మోదీ మరోసారి ప్రస్తావించారు. ముఖ్యంగా ఐక్యరాజ్య సమితి భద్రతా మండలి సంస్కరణతో పాటు
భారత్, ఇతర అభివృద్ధి చెందుతున్న శక్తులకు శాశ్వత ప్రాతినిధ్యం కల్పించాలన్న భారత డిమాండ్ను పునరుద్ఘాటించారు.
ఒకే వేదికపై కీలక నేతలు
రష్యా అధ్యక్షుడు వ్లాదిమిర్ పుతిన్, చైనా అధ్యక్షుడు షీ జిన్పింగ్,
ఇరాన్ అధ్యక్షుడు మసూద్ పెజెష్కియాన్, దక్షిణాఫ్రికా అధ్యక్షుడు
సిరిల్ రామఫోసా, అబుదాబి యువరాజు షేక్ ఖాలెద్ బిన్ మహమ్మద్ బిన్ జాయెద్ అల్ నహ్యాన్
సహా సభ్యదేశాల ప్రముఖ నేతలు శిఖరాగ్ర సమావేశానికి హాజరయ్యారు.
అంతర్జాతీయ వ్యవస్థను మరింత సమానత్వం, న్యాయం దిశగా నడిపించేందుకు బ్రిక్స్ దేశాలు
చరిత్రకు సరైన వైపున నిలవాలని షీ జిన్పింగ్ పిలుపునిచ్చారు.
- ఏకపక్ష సుంకాలపై తీవ్ర ఆందోళన
- వాణిజ్యేతర అడ్డంకులకు వ్యతిరేకత
- అంతర్జాతీయ చట్టాలకు విరుద్ధమైన ఏకపక్ష ఆర్థిక ఒత్తిళ్లకు వ్యతిరేకం
- బ్రిక్స్ దేశాల మధ్య సరిహద్దు చెల్లింపులపై ఆచరణాత్మక పరిష్కారాల అన్వేషణ
- అణు భద్రత, రక్షణ చర్యలకు ప్రాధాన్యం
- గ్లోబల్ సౌత్కు ప్రపంచ నిర్ణయాల్లో మరింత ప్రాతినిధ్యం
వాణిజ్య అడ్డంకులు, ఆర్థిక ఒత్తిళ్లు, భౌగోళిక రాజకీయ విభేదాల మధ్య
బ్రిక్స్ సభ్యదేశాలు ఏకగ్రీవంగా న్యూఢిల్లీ ప్రకటనను ఆమోదించడం భారత్ అధ్యక్షతన జరిగిన శిఖరాగ్ర సమావేశానికి
కీలక ఫలితంగా నిలిచింది.
