చిన్నచిన్న నిబంధనల ఉల్లంఘనలకు క్రిమినల్ కేసులు, కోర్టుల చుట్టూ తిరిగే పరిస్థితులకు ముగింపు పలికే దిశగా తెలంగాణ ప్రభుత్వం కీలక నిర్ణయం తీసుకుంది.
వ్యాపారాలు, పారిశ్రామిక సంస్థలు, వ్యక్తులు ఎదుర్కొంటున్న అనవసరమైన న్యాయపరమైన ఇబ్బందులను తగ్గించేందుకు
తెలంగాణ ప్రజా విశ్వాసం (చట్టాల సవరణల) బిల్లు–2026కు శనివారం రాష్ట్ర శాసనసభ ఆమోదం తెలిపింది.
ఈ సంస్కరణలో భాగంగా 400కుపైగా చిన్న నేరాలను నేరపూరిత పరిధి నుంచి తొలగించే అంశాలను ప్రభుత్వం గుర్తించింది.
చిన్న తప్పిదాలకు క్రిమినల్ చర్యలు వద్దు
ప్రతి చిన్న నియమ ఉల్లంఘనకు క్రిమినల్ చర్యలు తీసుకోవడం కంటే.. ఉల్లంఘన తీవ్రతకు అనుగుణంగా
జరిమానాలు విధించే విధానాన్ని తీసుకురావడమే బిల్లు ప్రధాన ఉద్దేశం.
నేరంగా పరిగణించాల్సిన అవసరం లేని చిన్నపాటి ఉల్లంఘనలకు
ద్రవ్యపరమైన జరిమానాలతోనే పరిష్కారం చూపేలా నిబంధనలను హేతుబద్ధీకరించనున్నారు.
400కుపైగా నిబంధనలపై కసరత్తు
పరిశ్రమల శాఖ ఆధ్వర్యంలో వివిధ ప్రభుత్వ శాఖలతో సంప్రదింపులు జరిపి.. ఏయే చిన్న నేరాలను
నేరపూరిత పరిధి నుంచి తొలగించవచ్చనే అంశంపై కసరత్తు చేశారు.
ఈ ప్రక్రియలో 400కుపైగా నేరాలను గుర్తించినట్లు
శాసనసభా వ్యవహారాలు, పరిశ్రమల శాఖ మంత్రి డి. శ్రీధర్బాబు తెలిపారు.
వ్యాపార నిర్వహణలో చిన్నపాటి నిబంధనల ఉల్లంఘనల కారణంగా క్రిమినల్ కేసులు ఎదుర్కొనే పరిస్థితిని తగ్గించడమే లక్ష్యమన్నారు.
కొన్ని కేసుల్లో రాజీకి అవకాశం
అన్ని విషయాలను కోర్టుల వరకు తీసుకెళ్లకుండా.. వర్తించే కొన్ని ఉల్లంఘనలను
రాజీ ద్వారా పరిష్కరించుకునే అవకాశం కల్పించడంపైనా బిల్లులో దృష్టి పెట్టారు.
దీంతో సుదీర్ఘ న్యాయపోరాటాలు, అనవసరమైన వ్యాజ్యాల భారం తగ్గే అవకాశం ఉందని ప్రభుత్వం భావిస్తోంది.
పాత చట్టాల తొలగింపునకు చర్యలు
ప్రజా విశ్వాసం బిల్లు కేవలం నేరాల డీక్రిమినలైజేషన్కే పరిమితం కాదు.
కాలానుగుణంగా అవసరం కోల్పోయిన పాత, అనవసరమైన చట్టాలు, నిబంధనలను తొలగించడం,
నియంత్రణ వ్యవస్థను మరింత పారదర్శకంగా, సరళంగా మార్చడం కూడా ఇందులో భాగం.
కొత్త నిబంధనలపై వ్యాపారులు, ప్రజలకు అవగాహన కల్పించేందుకు పరిశ్రమల శాఖ చర్యలు చేపట్టనుంది.
చిన్న వ్యాపారులకు రుణాలపై దృష్టి
బిల్లుపై చర్చ సందర్భంగా చిన్న వ్యాపారులు బ్యాంకు రుణాలు పొందడంలో ఎదుర్కొంటున్న ఇబ్బందులు కూడా ప్రస్తావనకు వచ్చాయి.
ముఖ్యంగా ఎస్సీ, ఎస్టీ, బీసీ, మైనారిటీ వర్గాలకు చెందిన చిన్న వ్యాపారవేత్తలకు రుణాల మంజూరులో సమస్యలు
ఉన్నాయని సభ్యులు ప్రభుత్వం దృష్టికి తీసుకెళ్లారు.
దీనిపై స్పందించిన శ్రీధర్బాబు.. రాష్ట్రస్థాయి బ్యాంకర్ల కమిటీకి ఈ అంశాన్ని పరిశీలించాలని సూచిస్తామని తెలిపారు.
కేంద్రం జన విశ్వాస్ విధానానికి అనుగుణంగా
చిన్న నేరాలను నేరపూరిత పరిధి నుంచి తొలగించి, జరిమానాలను హేతుబద్ధీకరించే కేంద్ర ప్రభుత్వ
జన విశ్వాస్ సంస్కరణల తరహాలోనే తెలంగాణలో ప్రజా విశ్వాసం బిల్లును తీసుకొచ్చినట్లు
మంత్రి శ్రీధర్బాబు తెలిపారు.
వ్యాపార నిర్వహణ సులభతరం కావడంతో పాటు, ప్రజలకు అనవసరమైన న్యాయపరమైన చిక్కులు తగ్గించడమే
ఈ సంస్కరణల ప్రధాన లక్ష్యంగా ప్రభుత్వం పేర్కొంది.
చిన్నపాటి నిబంధనల ఉల్లంఘనలకు క్రిమినల్ కేసుల బదులు జరిమానాలు,
కొన్ని సందర్భాల్లో రాజీకి అవకాశం, పాత నిబంధనల తొలగింపు, నియంత్రణ వ్యవస్థలో సరళీకరణ..
ఇలా 400కుపైగా నేరాల విషయంలో మార్పులకు తెలంగాణ అసెంబ్లీ ఆమోదం కీలక సంస్కరణకు నాంది పలికింది.
నియంత్రణ వ్యవస్థను సరళీకరించే దిశగా తెలంగాణ ప్రభుత్వం ఈ బిల్లును తీసుకొచ్చింది.
