భారత్‌పై విష ప్రచారం చేసిన మాజీ ఫ్రెంచ్ పైలట్‌కు ఇప్పుడు చైనా షాక్!

ఆపరేషన్ సిందూర్‌పై భారత్‌ను లక్ష్యంగా చేసుకున్న పియర్-హెన్రీ ష్యుయెట్‌పై ఫ్రాన్స్‌లో గూఢచర్య అభియోగాలు…

పారిస్, ఆగస్టు 1 ( వెబ్ డెస్క్ ):

2025లో భారత్ నిర్వహించిన ఆపరేషన్ సిందూర్ సందర్భంగా భారత వైమానిక దళంపై ఆధారాలు లేని ఆరోపణలు చేస్తూ, పాకిస్తాన్ వినియోగిస్తున్న చైనా యుద్ధవిమానాలను పొగుడుతూ ప్రచారం చేసిన మాజీ ఫ్రెంచ్ నేవీ రఫేల్ పైలట్ పియర్-హెన్రీ ష్యుయెట్ (Pierre-Henri Chuet) ఇప్పుడు తన దేశంలోనే తీవ్ర ఆరోపణలను ఎదుర్కొంటున్నారు. చైనాకు ప్రయోజనం చేకూరేలా వ్యవహరించారనే అనుమానాలతో ఫ్రాన్స్ న్యాయవ్యవస్థ ఆయనపై అధికారికంగా అభియోగాలు నమోదు చేసింది.

ఆపరేషన్ సిందూర్ అనంతరం భారత్ పలువురు యుద్ధవిమానాలను కోల్పోయిందంటూ ష్యుయెట్ చేసిన వ్యాఖ్యలు ప్రపంచవ్యాప్తంగా వైరల్ అయ్యాయి. భారత అధికారిక సమాచారం లేదా నిర్ధారిత ఆధారాలు లేకుండానే చేసిన ఈ వ్యాఖ్యలను భారత రక్షణ విశ్లేషకులు, మాజీ సైనికాధికారులు తీవ్రంగా ఖండించారు. చైనా, పాకిస్తాన్ ప్రచారానికి ఊతమిచ్చే విధంగా ఆయన వ్యాఖ్యలు ఉన్నాయని అప్పట్లో పెద్ద ఎత్తున విమర్శలు వచ్చాయి.

అయితే ఇప్పుడు అదే ష్యుయెట్‌పై ఫ్రాన్స్‌లో నమోదైన కేసు సంచలనంగా మారింది. ఫ్రెంచ్ మీడియా కథనాల ప్రకారం, 2018, 2019 సంవత్సరాల్లో ఫ్రెంచ్ నేవీలో సేవలందిస్తున్న సమయంలో అధికారిక అనుమతి లేకుండానే కనీసం రెండుసార్లు చైనా వెళ్లినట్లు దర్యాప్తులో గుర్తించారు. దక్షిణాఫ్రికాకు చెందిన ఓ విమానయాన సంస్థ ద్వారా చైనా సైనిక పైలట్లకు శిక్షణ ఇచ్చినట్లు, ఆ సందర్భంగా సున్నితమైన ఆపరేషనల్, వ్యూహాత్మక సమాచారాన్ని పంచి ఉండవచ్చని దర్యాప్తు సంస్థలు అనుమానిస్తున్నాయి.

ఈ వ్యవహారంపై ఫ్రాన్స్ అంతర్గత భద్రతా సంస్థ (DGSI) సుదీర్ఘ విచారణ జరిపిన అనంతరం విదేశీ శక్తితో అక్రమ సంబంధాలు, జాతీయ భద్రతకు సంబంధించిన సమాచారాన్ని బదిలీ చేసినట్లు అనుమానిస్తూ అధికారిక అభియోగాలు నమోదు చేశారు. ప్రస్తుతం కేసు న్యాయస్థానంలో విచారణలో ఉంది. అయితే ష్యుయెట్ తనపై వచ్చిన ఆరోపణలను ఖండిస్తూ, తాను ఎలాంటి రహస్య సమాచారాన్ని చైనాకు అందించలేదని పేర్కొంటున్నారు.

భారత్‌పై విష ప్రచారం చేస్తూ చైనా సైనిక సామర్థ్యాన్ని గొప్పగా చెప్పిన వ్యక్తిపైనే ఇప్పుడు చైనా సంబంధాలపై దర్యాప్తు జరగడం అంతర్జాతీయంగా చర్చనీయాంశమైంది. ఒకప్పుడు భారత్‌పై వేలెత్తి చూపిన వ్యక్తి, ఇప్పుడు తనపైనే వచ్చిన ఆరోపణలకు సమాధానం చెప్పాల్సిన పరిస్థితి రావడం విశేషంగా మారింది. అయితే ప్రస్తుతం ఇవి ఫ్రాన్స్ న్యాయవ్యవస్థ ముందు ఉన్న ఆరోపణలు మాత్రమే. కేసుపై తుది తీర్పు రావాల్సి ఉంది.