ఓలా, ఉబర్, రాపిడోతో పాటు ఫుడ్ డెలివరీ సేవలపైనా ప్రభావం.. న్యాయమైన చెల్లింపులు, సామాజిక భద్రత కోసం పోరాటం
హైదరాబాద్, ఆగస్టు 7 (నవజ్యోతి ప్రతినిధి): తెలంగాణలో యాప్ ఆధారిత క్యాబ్ డ్రైవర్లు, ఆటో డ్రైవర్లు, ఫుడ్ డెలివరీ బాయ్స్, క్విక్ కామర్స్ డెలివరీ సిబ్బంది శనివారం (ఆగస్టు 8) నుంచి నిరవధిక సమ్మెకు దిగనున్నారు. తెలంగాణ యాప్ బేస్డ్ డ్రైవర్స్ ఫోరం (TADF), తెలంగాణ గిగ్ అండ్ ప్లాట్‌ఫామ్ వర్కర్స్ యూనియన్ (TGPWU) ఆధ్వర్యంలో ఈ ఆందోళన చేపడుతున్నారు. ప్రభుత్వం, యాప్ కంపెనీలు తమ డిమాండ్లను పట్టించుకోకపోవడంతో ఈ నిర్ణయం తీసుకున్నట్లు యూనియన్ నాయకులు తెలిపారు.
జూలై 22న నిర్వహించిన హెచ్చరిక సమ్మె అనంతరం కూడా సమస్యలు పరిష్కారం కాకపోవడంతో రాష్ట్రవ్యాప్తంగా నిరవధిక సమ్మెకు పిలుపునిచ్చారు. దీంతో హైదరాబాద్‌తో పాటు తెలంగాణ వ్యాప్తంగా ఓలా, ఉబర్, రాపిడో క్యాబ్‌లు, ఆటోలు, స్విగ్గీ, జొమాటో, జెప్టో, బ్లింకిట్ వంటి డెలివరీ సేవలు తీవ్రంగా ప్రభావితమయ్యే అవకాశం ఉంది.
యాప్ ద్వారా రైడ్‌లు, ఫుడ్ డెలివరీలు, కిరాణా సరఫరా, లాజిస్టిక్స్ సేవలు అందించే కార్మికులను గిగ్ లేదా ప్లాట్‌ఫామ్ వర్కర్లుగా పరిగణిస్తారు. వీరు శాశ్వత ఉద్యోగులు కాకపోవడంతో జీతం, పీఎఫ్, ఈఎస్ఐ, పెన్షన్ వంటి ఉద్యోగ భద్రతా ప్రయోజనాలు సాధారణంగా ఉండవు.
- ప్రతి ట్రిప్‌కు ప్రభుత్వం కనీస బేస్ ఫేర్ నిర్ణయించాలి.
- కిలోమీటర్‌కు న్యాయమైన చెల్లింపు అమలు చేయాలి.
- యాప్ కంపెనీలు వసూలు చేసే అధిక కమిషన్ తగ్గించాలి.
- గిగ్ వర్కర్ల కోసం ప్రత్యేక సంక్షేమ బోర్డు ఏర్పాటు చేయాలి.
- ప్రమాద బీమా, ఆరోగ్య బీమా, పెన్షన్, సామాజిక భద్రత కల్పించాలి.
- అన్యాయంగా ఐడీలను బ్లాక్ చేయడాన్ని నిలిపివేసి పారదర్శక అప్పీల్ వ్యవస్థ ఏర్పాటు చేయాలి.
- వెయిటింగ్, క్యాన్సిలేషన్ ఛార్జీలను పూర్తిగా కార్మికులకే చెల్లించాలి.
- టోల్, ఇంధన వ్యయాలకు తగిన పరిహారం ఇవ్వాలి.
- ప్రభుత్వ మోటార్ వెహికల్ అగ్రిగేటర్ మార్గదర్శకాల ప్రకారం కనీస చార్జీలు అమలు చేయాలి.
యూనియన్ల ప్రకారం గత కొన్నేళ్లుగా డ్రైవర్ల ఆదాయం తగ్గుతుండగా ఇంధనం, వాహన నిర్వహణ, ఈఎంఐలు, బీమా ఖర్చులు భారీగా పెరిగాయి. కంపెనీలు అల్గారిథమ్‌ల ద్వారా చెల్లింపులు తగ్గిస్తున్నాయని, పని గంటలు పెరుగుతున్నా ఆదాయం పెరగడం లేదని ఆరోపిస్తున్నారు.
గిగ్ వర్కర్లకు ప్రత్యేక చట్టం తీసుకురావాలని, సంక్షేమ బోర్డు ఏర్పాటు చేసి కార్మికుల నమోదుతో పాటు సామాజిక భద్రత కల్పించాలని యూనియన్లు కోరుతున్నాయి. తెలంగాణ ప్రభుత్వం ఇప్పటికే గిగ్ వర్కర్లను కనీస వేతనాల పరిధిలోకి తీసుకొచ్చే చర్యలు ప్రారంభించినప్పటికీ, పూర్తి స్థాయి అమలు కోసం ప్రత్యేక నిబంధనలు వెంటనే జారీ చేయాలని డిమాండ్ చేస్తున్నాయి.
నిరవధిక సమ్మె కొనసాగితే క్యాబ్‌లు, ఆటోలు, ఫుడ్ డెలివరీలు, క్విక్ కామర్స్ సేవలు, చిన్న పార్సిల్ రవాణా సేవలు అంతరాయం కలిగే అవకాశం ఉంది. ముఖ్యంగా ఉద్యోగులు, విద్యార్థులు, విమానాశ్రయ ప్రయాణికులు ఇబ్బందులు ఎదుర్కొనే పరిస్థితి ఏర్పడవచ్చని అంచనా వేస్తున్నారు.
