కేసుల విచారణ రెండు నెలల్లో పూర్తి చేయడమే లక్ష్యం
న్యూఢిల్లీ, జూలై 27 (నవజ్యోతి న్యూస్):
దేశవ్యాప్తంగా ప్రజా పరీక్షల్లో ప్రశ్నపత్రాల లీకేజీ ఘటనలను అరికట్టేందుకు కేంద్ర ప్రభుత్వం కీలక నిర్ణయం తీసుకుంది. ప్రజా పరీక్షల (లీకేజీ నిరోధక) సవరణ బిల్లును కేంద్ర మంత్రి జితేంద్ర సింగ్ సోమవారం లోక్సభలో ప్రవేశపెట్టారు. ఇటీవల నీట్తో పాటు పలు పరీక్షల్లో చోటుచేసుకున్న పేపర్ లీకేజీ ఘటనల నేపథ్యంలో చట్టాన్ని మరింత కఠినతరం చేయాలని ప్రభుత్వం నిర్ణయించింది.
కొత్త బిల్లు ప్రకారం పేపర్ లీకేజీకి పాల్పడిన వారిపై వేగవంతమైన విచారణతో పాటు కఠిన శిక్షలు విధించేలా నిబంధనలను బలోపేతం చేయనున్నారు. కేసుల విచారణను సాధ్యమైనంత వరకు రెండు నెలల్లో పూర్తిచేసే విధానాన్ని అమలు చేయాలని ప్రతిపాదించారు. అలాగే అన్ని రాష్ట్రాల్లో పేపర్ లీకేజీ కేసుల విచారణ కోసం ప్రత్యేక ఫాస్ట్ ట్రాక్ కోర్టులను ఏర్పాటు చేయాలని బిల్లులో పేర్కొన్నారు. దీంతో నిందితులకు త్వరితగతిన శిక్షలు పడటంతో పాటు పరీక్షల నిర్వహణలో పారదర్శకత పెరుగుతుందని కేంద్రం భావిస్తోంది.
బిల్లును ప్రవేశపెట్టిన సమయంలో ఢిల్లీలో విద్యార్థులపై జరిగిన లాఠీచార్జ్ ఘటనను నిరసిస్తూ ప్రతిపక్ష సభ్యులు లోక్సభలో నినాదాలు చేశారు. సభలో గందరగోళం నెలకొనడంతో స్పీకర్ ఓం బిర్లా సభను మధ్యాహ్నం రెండు గంటల వరకు వాయిదా వేశారు. విద్యార్థుల్లో పరీక్షలపై విశ్వాసాన్ని పెంపొందించడం, ప్రశ్నపత్రాల లీకేజీ వంటి అక్రమాలకు శాశ్వత అడ్డుకట్ట వేయడమే ఈ సవరణ బిల్లు ప్రధాన ఉద్దేశమని కేంద్ర ప్రభుత్వం వెల్లడించింది.
