దక్షిణాది రాష్ట్రాల ప్రయోజనాలే లక్ష్యం !

మహాబలిపురం:

కేంద్రం, రాష్ట్రాల మధ్య, రాష్ట్రాల పరస్పర ప్రయోజనాలకు సంబంధించిన సమస్యలను చర్చించి సామరస్యపూర్వకంగా పరిష్కరించేందుకు దక్షిణ ప్రాంతీయ మండలి కీలక వేదికగా పనిచేస్తోందని తెలంగాణ ఉప ముఖ్యమంత్రి భట్టి విక్రమార్క మల్లు అన్నారు. 31వ దక్షిణ ప్రాంతీయ మండలి సమావేశంలో తెలంగాణ తరఫున ఆయన పలు కీలక అంశాలను ప్రస్తావించారు.

మహాబలిపురంలోని చారిత్రక కట్టడాలను ప్రస్తావించిన భట్టి విక్రమార్క.. బలమైన నిర్మాణానికి ప్రతి భాగం ఒకేలా ఉండాల్సిన అవసరం లేదని, ప్రతి భాగం తన వంతు బరువును మోయాల్సి ఉంటుందని అన్నారు. భారత సమాఖ్య వ్యవస్థను కూడా ఇదే స్ఫూర్తితో చూడాలని పేర్కొన్నారు.

పోటీతో పాటు సహకారం అవసరం

పెట్టుబడులు, పరిశ్రమలు, ఉపాధి, ప్రతిభ కోసం రాష్ట్రాలు పరస్పరం పోటీ పడటం సహజమేనని భట్టి విక్రమార్క అన్నారు. అయితే నదులు, విద్యుత్‌ గ్రిడ్లు, కార్మికులు, వ్యాపారాలు రాష్ట్రాల సరిహద్దులను దాటి వెళ్తున్నాయని తెలిపారు.

“ప్రభుత్వ ఫైళ్ల కంటే సమస్యలు సరిహద్దులను వేగంగా దాటుతున్నాయి” అని ఆయన చమత్కరించారు. రాష్ట్రాల మధ్య పరస్పర ఆధారపడటం వల్లే దక్షిణ ప్రాంతీయ మండలి వంటి సంస్థలు అవసరమని పేర్కొన్నారు.

తెలంగాణది స్పష్టమైన వైఖరి

తెలంగాణకు సహకార సమాఖ్య విధానమంటే నిబంధనలు స్పష్టంగా ఉండటం, వివాదాల పరిష్కారానికి ఏర్పాటైన సంస్థలను గౌరవించడం, అన్ని రాష్ట్రాలకు ఒకే నిబంధనలు వర్తింపజేయడమని భట్టి విక్రమార్క వివరించారు.

దీర్ఘకాలంగా చర్చలు కొనసాగించడం కంటే తుది నిర్ణయాలు తీసుకుని వాటిని సమర్థవంతంగా అమలు చేయాల్సిన అవసరం ఉందన్నారు. ప్రజాస్వామ్యంలో భిన్నాభిప్రాయాలు సహజమేనని, వాటిని నిర్ణయాలుగా మార్చడమే అసలైన పరీక్ష అని పేర్కొన్నారు.

కృష్ణా జలాల్లో న్యాయమైన వాటా కావాలి

కృష్ణా జలాల విషయంలో తెలంగాణకు ప్రత్యేక ప్రయోజనం అవసరం లేదని, ఇప్పటికే ఏర్పాటైన చట్టపరమైన వ్యవస్థల ద్వారా తమకు దక్కాల్సిన న్యాయమైన వాటాను మాత్రమే కోరుకుంటున్నామని భట్టి విక్రమార్క స్పష్టం చేశారు.

దిగువ రాష్ట్రాల హక్కులకు భంగం కలిగించే ఏకపక్ష చర్యలకు రక్షణ కల్పించాలని కోరారు. కృష్ణా జలాల విషయంలో ఏర్పాటైన వివాద పరిష్కార వ్యవస్థలను గౌరవించి, అన్ని నదీ పరివాహక రాష్ట్రాలకు ఒకే విధమైన సూత్రాలను వర్తింపజేయాలని తెలంగాణ కోరుతోందన్నారు.

పాలమూరు-రంగారెడ్డి, నక్కలగండి ప్రాజెక్టులపై

మిగులు జలాలపై దిగువ నదీ పరివాహక రాష్ట్రంగా తెలంగాణకు ఉన్న హక్కులను పునరుద్ఘాటించారు. తెలంగాణ, ఆంధ్రప్రదేశ్ మధ్య కృష్ణా జలాల పంపకాల అంశం ఇప్పటికే కృష్ణా జల వివాద ట్రైబ్యునల్‌-2 (KWDT-II) పరిధిలో పరిశీలనలో ఉందని తెలిపారు.

అందువల్ల ఈ అంశాన్ని ఇప్పటికే ఉన్న చట్టపరమైన, న్యాయపరమైన ప్రక్రియల ద్వారానే పరిష్కరించాలని తెలంగాణ కోరింది.

సాగునీటి ప్రాజెక్టులకు కేంద్ర సాయం కోరిన తెలంగాణ

కాళేశ్వరం, పాలమూరు-రంగారెడ్డి ఎత్తిపోతల పథకాలకు కేంద్ర ప్రభుత్వం ఆర్థిక సహాయం అందించాలని తెలంగాణ కోరింది.

కాళేశ్వరం ప్రాజెక్టు బ్యారేజీల పునరుద్ధరణ పనులు కొనసాగుతున్నాయని, తుమ్మిడిహెట్టి వద్ద ప్రాణహిత-చేవెళ్ల ప్రాజెక్టు పునరుద్ధరణను కూడా ముందుకు తీసుకెళ్తున్నామని తెలిపింది.

పాలమూరు-రంగారెడ్డి ఎత్తిపోతల పథకంలో మిగిలిన పనులను పూర్తి చేయడానికి కేంద్ర సహాయం అందించాలని, ప్రాజెక్టును పూర్తిస