పోలీస్ డ్యూటీ అంటూ నమ్మించిన యువతి.. రోస్టర్లో పేరు లేకపోవడంతో బట్టబయలు..
పంజాబ్, ఆగస్టు 8 (నవజ్యోతి ప్రతినిధి): పెళ్లి కోసం తాను పోలీస్ అధికారినని నమ్మించేందుకు ఏకంగా యూనిఫాం వేసుకున్న ఓ యువతి బాగోతం చివరకు టిఫిన్ బాక్సుతో బయటపడింది. పంజాబ్లోని మాలేవాలా గ్రామానికి చెందిన కోమల్ప్రీత్ కౌర్ పోలీస్ శాఖలో ఏఎస్ఐగా పనిచేస్తున్నట్లు చెప్పుకుంటూ కొంతకాలంగా చెలామణి అయినట్లు సమాచారం.
మంచి కుటుంబానికి చెందిన యువకుడిని పెళ్లి చేసుకోవాలనే ఉద్దేశంతోనే ఆమె పోలీస్ వేషం వేసుకున్నట్లు తెలుస్తోంది. తనకు నచ్చిన వ్యక్తిని పెళ్లి చేసుకున్న తర్వాత కూడా అసలు విషయం బయటపడకుండా పోలీస్ యూనిఫాంలో తిరుగుతూ తన నకిలీ ఉద్యోగాన్ని కొనసాగించినట్లు సమాచారం.
ఈ క్రమంలో ఆమె మోగా సిటీ-1 పోలీస్స్టేషన్ పరిధిలోని సంజ్ కేంద్రం వద్దకు టిఫిన్ బాక్స్ తీసుకెళ్లేది. అక్కడ నిజమైన పోలీసులు కూడా తమ టిఫిన్ బాక్సులు ఉంచుతుండటంతో ఆమె కూడా అదే విధంగా చేసేది. తాను ట్రాఫిక్ డ్యూటీలో ఉన్నానని అక్కడి పోలీసులకు చెప్పేది.
అయితే ఆమె వ్యవహారశైలిపై అనుమానం వచ్చిన పోలీసులకు అసలు కథ అక్కడే మొదలైంది. ఆమె చెప్పిన డ్యూటీ వివరాలను పరిశీలించగా అధికారిక డ్యూటీ రోస్టర్లో కోమల్ప్రీత్ కౌర్ పేరు కనిపించలేదు. దీంతో పోలీసులు ఆమెను ప్రశ్నించగా మొదట తప్పించుకునే ప్రయత్నం చేసినట్లు సమాచారం.
లోతుగా విచారించడంతో తాను పోలీస్ శాఖలో పనిచేయడం లేదనే విషయం బయటపడింది. అనంతరం నకిలీ పోలీస్ వేషధారణ, అధికార గుర్తుల దుర్వినియోగం, ఫోర్జరీ తదితర అంశాలపై పోలీసులు కేసు నమోదు చేసి దర్యాప్తు చేపట్టినట్లు సమాచారం.
పెళ్లి కోసం వేసుకున్న యూనిఫాం.. చివరకు నిజమైన పోలీసులకే అనుమానం తెప్పించింది. టిఫిన్ పెట్టే చోట మొదలైన అనుమానం.. డ్యూటీ రోస్టర్ దగ్గర అసలు వేషాన్ని బయటపెట్టింది.
