కొందరికి దశాబ్దాలు కాదు.. ఏకంగా 179 ఏళ్ల నిరీక్షణ! EB-2లో పరిస్థితి మరింత దారుణం
వాషింగ్టన్, ఆగస్టు 28 (నవజ్యోతి ప్రతినిధి):
అమెరికాలో శాశ్వత నివాసం కోసం ఎదురుచూస్తున్న భారతీయ నిపుణులకు షాకింగ్‌ పరిస్థితి నెలకొంది. ఉద్యోగ ఆధారిత గ్రీన్‌కార్డ్‌ కోసం అమెరికా ఇమ్మిగ్రేషన్‌ వ్యవస్థలో
దాదాపు 10 లక్షల మంది భారతీయులు క్యూ లో ఉన్నట్లు నేషనల్‌ ఫౌండేషన్‌ ఫర్‌ అమెరికన్‌ పాలసీ (NFAP) విశ్లేషణ వెల్లడించింది.
డిసెంబర్‌ 2025 నాటికి మొదటి మూడు ఉద్యోగ ఆధారిత కేటగిరీలైన EB-1, EB-2, EB-3లో మొత్తం
9,96,599 మంది భారతీయులు గ్రీన్‌కార్డ్‌ కోసం వేచి ఉన్నట్లు NFAP అంచనా వేసింది. అమెరికా ఉద్యోగ ఆధారిత గ్రీన్‌కార్డ్‌ బ్యాక్‌లాగ్‌లో భారతీయుల వాటా దాదాపు 79 శాతంగా ఉంది.
EB-2లో ఏకంగా 179 ఏళ్ల వెయిటింగ్‌?
2026 జనవరిలో లేదా ఆ తర్వాత తమ లేబర్‌ సర్టిఫికేషన్‌ దరఖాస్తు లేదా ఉద్యోగ ఆధారిత ఇమ్మిగ్రెంట్‌ పిటిషన్‌ దాఖలు చేసిన భారతీయులకు
EB-2 కేటగిరీలో సంభావ్య నిరీక్షణ కాలం 179 ఏళ్ల వరకు ఉండొచ్చని NFAP అంచనా వేసింది. EB-3లో ఈ వ్యవధి సుమారు 38 ఏళ్లుగా ఉండొచ్చని పేర్కొంది.
EB-1 పరిస్థితి మాత్రం తులనాత్మకంగా మెరుగ్గా ఉంది. ఈ కేటగిరీలో భారతీయులకు సుమారు 4 నుంచి 5 ఏళ్ల నిరీక్షణ ఉండొచ్చని అంచనా. ఇవి అంచనా వేసిన బ్యాక్‌లాగ్‌ ఆధారిత కాలాలు మాత్రమే కాగా, అమెరికా ప్రభుత్వ అదనపు ప్రాసెసింగ్‌ సమయం ఇందులో కలపలేదు.
భారతీయుల గ్రీన్‌కార్డ్‌ బ్యాక్‌లాగ్‌:
🔹 EB-1 – 51,619 మంది
🔹 EB-2 – 7,31,566 మంది
🔹 EB-3 – 2,13,414 మంది
🔹 మొత్తం – 9,96,599 మంది
ఐదేళ్లలో 19.3 శాతం పెరిగిన బ్యాక్‌లాగ్‌
భారతీయుల గ్రీన్‌కార్డ్‌ బ్యాక్‌లాగ్‌ 2020 ఏప్రిల్‌ నుంచి 2025 డిసెంబర్‌ వరకు
1,61,344 మందితో, 19.3 శాతం పెరిగింది. ఇందులో EB-2 బ్యాక్‌లాగ్‌ 17.6 శాతం, EB-3 బ్యాక్‌లాగ్‌ ఏకంగా 51.1 శాతం పెరగడం పరిస్థితి తీవ్రతను చూపిస్తోంది. అదే సమయంలో EB-1 బ్యాక్‌లాగ్‌ 28.3 శాతం తగ్గింది.
అసలు ఇంత ఆలస్యం ఎందుకు?
అమెరికా ఇమ్మిగ్రేషన్‌ చట్టంలోని రెండు ప్రధాన పరిమితులే ఈ భారీ క్యూ కు కారణమని NFAP పేర్కొంది. ప్రతి ఏడాది ఉద్యోగ ఆధారిత కేటగిరీలకు
1,40,000 గ్రీన్‌కార్డుల పరిమితి ఉంది. ఇందులో ప్రధాన దరఖాస్తుదారులతో పాటు వారి జీవిత భాగస్వాములు, పిల్లల సంఖ్య కూడా లెక్కలోకి వస్తుంది.
మరోవైపు ఒక్క దేశానికి సాధారణంగా మొత్తం ఉద్యోగ ఆధారిత ఇమ్మిగ్రెంట్‌ వీసాల్లో
7 శాతం మించకుండా పరిమితి ఉంటుంది. భారీ జనాభా, అధిక సంఖ్యలో దరఖాస్తుదారులు ఉన్న భారత్‌, చైనాలకూ చిన్న దేశాలతో సమానమైన దేశవారీ పరిమితి వర్తిస్తుండటంతో బ్యాక్‌లాగ్‌ పెరుగుతోంది.
సెప్టెంబర్‌ వీసా బులెటిన్‌లోనూ పెద్ద మార్పు లేదు
సెప్టెంబర్‌ 2026 అమెరికా Visa Bulletin ప్రకారం భారతీయుల ఉద్యోగ ఆధారిత ఫైనల్‌ యాక్షన్‌ తేదీల్లో పెద్దగా మార్పు లేదు. EB-1కు అక్టోబర్‌ 15, 2022గా, EB-2ను ‘Unavailable’గా, EB-3కు జనవరి 1, 2014గా తేదీలు ఉన్నాయి.
అయితే దరఖాస్తు దాఖలు చేయడానికి సంబంధించిన తేదీల్లో EB-1కు డిసెంబర్‌ 1, 2023, EB-2కు జనవరి 15, 2015, EB-3కు జనవరి 15, 2015 తేదీలను సెప్టెంబర్‌ బులెటిన్‌ పేర్కొంది. ఏ చార్ట్‌ను ఉపయోగించాలో దరఖాస్తుదారులు USCIS మార్గదర్శకాలను పరిశీలించాల్సి ఉంటుంది.
2025–26లో దరఖాస్తు చేసినవారికి దశాబ్దాల నిరీక్షణ?
ప్రస్తుత పరిస్థితుల్లో 2025 లేదా 2026లో EB-2, EB-3 కింద దరఖాస్తు చేసిన భారతీయులు
ఏళ్లలో కాకుండా దశాబ్దాల్లో నిరీక్షించే పరిస్థితి ఎదుర్కొనే అవకాశం ఉందని NFAP పేర్కొంది. అమెరికా కాంగ్రెస్‌ ఇమ్మిగ్రేషన్‌ చట్టంలో మార్పులు చేస్తే తప్ప ఈ సమస్య త్వరగా పరిష్కారమయ్యే అవకాశాలు పరిమితంగానే ఉన్నాయని విశ్లేషించింది.
