రూ.5 లక్షలకు నాలుగు రోజుల పసికందును విక్రయించే యత్నం భగ్నం !

హైదరాబాద్‌లో నాలుగు రోజుల పసికందును రూ.5 లక్షలకు విక్రయించే ప్రయత్నాన్ని బాలాపూర్ పోలీసులు భగ్నం చేశారు. సామాజిక కార్యకర్త అందించిన విశ్వసనీయ సమాచారంతో అప్రమత్తమైన పోలీసులు ఉచ్చుపన్ని చిన్నారిని సురక్షితంగా రక్షించి, ఈ వ్యవహారంలో ప్రధాన నిందితురాలు వహీదా ఖాతూన్‌ను అరెస్టు చేశారు.

పోలీసుల వివరాల ప్రకారం, చంద్రాయణగుట్టకు చెందిన వహీదా ఖాతూన్ మధ్యవర్తి ద్వారా కొనుగోలుదారులను సంప్రదించింది. తొలుత చిన్నారిని రూ.6 లక్షలకు విక్రయించాలని ప్రయత్నించగా, అనంతరం ధరను రూ.5 లక్షలకు తగ్గించి ఒప్పందం కుదుర్చుకున్నట్లు విచారణలో వెల్లడైంది.

మొదట షాహీన్‌నగర్‌లో ఈ వ్యవహారాన్ని పూర్తి చేయాలని భావించిన నిందితులు, తర్వాత పహాడీ షరీఫ్‌లోని జేజేఆర్ ఫంక్షన్ హాల్ సమీపానికి వేదికను మార్చారు. ఈ సమాచారం అందుకున్న సామాజిక కార్యకర్త సఫియా మాహి వెంటనే బాలాపూర్ పోలీసులకు సమాచారం ఇవ్వడంతో పోలీసులు ఉచ్చుపన్ని నిందితురాలిని రెడ్‌హ్యాండెడ్‌గా పట్టుకున్నారు.

పోలీసుల కథనం ప్రకారం, గోల్కొండకు చెందిన ఓ మహిళ మంగళవారం ఆడశిశువుకు జన్మనిచ్చింది. మలక్‌పేటలోని ఆస్పత్రి నుంచి డిశ్చార్జ్ అయిన రోజునే చిన్నారిని విక్రయించేందుకు ప్రయత్నించినట్లు దర్యాప్తులో తేలింది. శిశువును విక్రయించడానికి దారితీసిన పరిస్థితులపై కూడా పోలీసులు విచారణ జరుపుతున్నారు.

ఈ ఘటన చిన్నారుల అక్రమ రవాణా (చైల్డ్ ట్రాఫికింగ్) ముఠాలతో సంబంధం ఉందా? ఇందులో మరికొందరు మధ్యవర్తులు లేదా ఇతర వ్యక్తుల ప్రమేయం ఉందా? అనే కోణంలో పోలీసులు దర్యాప్తు చేపట్టారు. ఈ కేసులో మరిన్ని అరెస్టులు జరిగే అవకాశం ఉందని అధికారులు తెలిపారు.