జీఆర్‌ కాలనీ బ్రిడ్జిపై మాజీ ప్రభుత్వ చీఫ్ విప్ గంప గోవర్ధన్‌ ఆధ్వర్యంలో రాస్తారోకో

ఏడాది గడిచినా డివైడర్ల పునర్నిర్మాణం కాలేదని ఆరోపణ.. నిధులు మంజూరు కాలేదన్న మాజీ ఎమ్మెల్యే

కామారెడ్డి, ఆగస్టు 27 (నవజ్యోతి ప్రతినిధి):

గత ఏడాది వరదలకు దెబ్బతిన్న జీఆర్‌ కాలనీ బ్రిడ్జి డివైడర్ల పునర్నిర్మాణ పనులు ఇప్పటికీ పూర్తికాకపోవడాన్ని నిరసిస్తూ బీఆర్‌ఎస్‌ నేత, కామారెడ్డి మాజీ ఎమ్మెల్యే గంప గోవర్ధన్‌ ఆధ్వర్యంలో గురువారం ఆందోళన చేపట్టారు. ఎన్‌హెచ్‌-7పై రాస్తారోకో నిర్వహించి బ్రిడ్జిపై దెబ్బతిన్న ప్రాంతాలను పరిశీలించారు.

గత ఏడాది వరదల సమయంలో స్థానిక ఎమ్మెల్యే కాటిపల్లి వెంకటరమణారెడ్డి స్వయంగా బ్రిడ్జిపై దెబ్బతిన్న డివైడర్లను తొలగించారని గంప గోవర్ధన్‌ ఆరోపించారు. అప్పటి నుంచి ఏడాది గడిచినా వాటి పునర్నిర్మాణం చేపట్టలేదని విమర్శించారు.

సీఎం పర్యటన.. హామీలు ఎక్కడ?

వరదల అనంతరం ముఖ్యమంత్రి ఏ. రేవంత్‌రెడ్డి కామారెడ్డిలో పర్యటించి వరద ప్రభావిత ప్రాంతాలను పరిశీలించడంతో పాటు అధికారులతో సమీక్ష నిర్వహించినా సమస్య పరిష్కారం కాలేదని గంప గోవర్ధన్‌ అన్నారు. అనంతరం ప్రభుత్వ సలహాదారు మహమ్మద్‌ అలీ షబ్బీర్‌, ఎమ్మెల్యే కాటిపల్లి వెంకటరమణారెడ్డి తదితరులు కూడా సమస్యను పరిశీలించి నిధులు మంజూరు చేస్తామని హామీ ఇచ్చారని పేర్కొన్నారు.

అయితే ఇప్పటివరకు పనులకు ఒక్క రూపాయి కూడా మంజూరు కాలేదని ఆయన ఆరోపించారు. ప్రజల సమస్యలపై పర్యటనలు, సమీక్షలు నిర్వహించడం మాత్రమే కాకుండా హామీలను క్షేత్రస్థాయిలో అమలు చేయాలని డిమాండ్‌ చేశారు.

హామీలపై వినూత్న నిరసన

ప్రభుత్వం ఇచ్చిన హామీలు అమలు కాలేదని ఆరోపిస్తూ సీఎం రేవంత్‌రెడ్డి, ఎమ్మెల్యే కాటిపల్లి వెంకటరమణారెడ్డి, ప్రభుత్వ సలహాదారు మహమ్మద్‌ అలీ షబ్బీర్‌కు పిండ ప్రదానం చేసి గంప గోవర్ధన్‌ వర్గం నిరసన తెలిపింది. అనంతరం బ్రిడ్జిపైనే బైఠాయించి నల్లకండువాలు ధరించి ప్రభుత్వ తీరును వ్యతిరేకించారు.

రోడ్లు, డ్రైనేజీకి నిధులు ఇవ్వాలి

జీఆర్‌ కాలనీ, హౌసింగ్‌ బోర్డు కాలనీల్లో వరదల కారణంగా దెబ్బతిన్న రోడ్లు, బ్రిడ్జిలు, డ్రైనేజీ వ్యవస్థ పునరుద్ధరణకు తక్షణమే నిధులు మంజూరు చేసి పనులు ప్రారంభించాలని గంప గోవర్ధన్‌ డిమాండ్‌ చేశారు.

ప్రజలు ఎదుర్కొంటున్న సమస్యలకు శాశ్వత పరిష్కారం చూపాలని, సీఎం పర్యటనలు, అధికారుల సమీక్షలు కేవలం హామీలకే పరిమితం కాకుండా పనులు జరిగేలా చర్యలు తీసుకోవాలని ఆయన అన్నారు.