విద్యార్థినులతో కలిసి భోజనం.. వసతులపై ఆరా.. భద్రతపై ప్రత్యేక దృష్టి
బాన్సువాడ, ఆగస్టు 12 (నవజ్యోతి ప్రతినిధి): బాన్సువాడ మండలం బోర్లం గ్రామంలోని టీజీఎస్డబ్ల్యూఆర్ఎస్ జూనియర్ కళాశాల (బాలికల)ను జిల్లా కలెక్టర్ ఆశిష్ సంగ్వాన్, జిల్లా ఎస్పీ రాజేష్ చంద్ర బుధవారం ఆకస్మికంగా తనిఖీ చేశారు. తరగతి గదులు, విద్యార్థినుల వసతులు, రికార్డులను పరిశీలించి పలు వివరాలు తెలుసుకున్నారు.
కళాశాలకు చేరుకున్న కలెక్టర్, ఎస్పీ తరగతి గదులను సందర్శించి విద్యార్థినులతో మాట్లాడారు. చదువులు, వసతులు, భోజనం, ఇతర సౌకర్యాలపై ఆరా తీశారు. బ్లాక్బోర్డుపై రాసిన పాఠాలు, స్కూల్ రికార్డులు, రిపోర్టులు, ట్రోఫీలను పరిశీలించారు. అధ్యాపకులతో బోధనా విధానంపై చర్చించారు.
అనంతరం కలెక్టర్, ఎస్పీ విద్యార్థినులతో కలిసి మధ్యాహ్న భోజనం చేశారు. భోజన నాణ్యత, మెనూ, పరిశుభ్రతపై వివరాలు అడిగి తెలుసుకున్నారు. విద్యార్థినులు ఎలాంటి ఇబ్బందులు లేకుండా చదువుకోవాలని, క్రమశిక్షణతో ముందుకు సాగి ఉన్నత లక్ష్యాలను సాధించాలని సూచించారు.
కళాశాల ఆవరణను పరిశీలించిన కలెక్టర్.. విద్యార్థినులకు అవసరమైన మౌలిక సదుపాయాలను మెరుగుపరచాలని సంబంధిత అధికారులకు సూచించారు. నాణ్యమైన విద్యతో పాటు సురక్షితమైన, మెరుగైన వాతావరణం కల్పించేందుకు చర్యలు తీసుకోవాలని ఆదేశించారు.
కాగా, ఇదే బోర్లం సాంఘిక సంక్షేమ బాలికల గురుకులంలో ఈ ఏడాది జనవరిలో 8వ తరగతి విద్యార్థిని సంగీత (13) మృతి చెందిన ఘటన అప్పట్లో తీవ్ర కలకలం రేపింది. పాఠశాలకు ఫర్నిచర్ తరలించే సమయంలో ఆటో నుంచి విద్యార్థినులు కిందపడిన ఘటనలో సంగీత తీవ్రంగా గాయపడి మృతి చెందింది. ఈ కేసులో అప్పటి ప్రిన్సిపాల్తో పాటు ఆటోడ్రైవర్, మరో వ్యక్తిని పోలీసులు అరెస్టు చేసినట్లు అప్పటి వార్తా కథనాలు పేర్కొన్నాయి.
గురుకులాల్లో విద్యార్థినుల భద్రత, పర్యవేక్షణ, మౌలిక వసతులపై అధికారులు ప్రత్యేక దృష్టి సారించాల్సిన అవసరం ఉందన్న అభిప్రాయాలు వ్యక్తమవుతున్నాయి.
అయితే ప్రస్తుత కలెక్టర్, ఎస్పీ తనిఖీకి గతంలో జరిగిన ఘటన కారణంగా ప్రాధాన్యత అంతరించుకుంది.
ఈ తనిఖీలో బాన్సువాడ ఆర్డీఓ రవీందర్రెడ్డి, డీసీఓ, ఎంపీడీఓ, మున్సిపల్ కమిషనర్, తహసీల్దార్, గిర్దావర్, జీపీఓ, పంచాయతీ కార్యదర్శి తదితర అధికారులు పాల్గొన్నారు.
