బాధితురాలి ఫిర్యాదుతో అమీన్పూర్ పోలీస్స్టేషన్లో కేసు నమోదు..
అమీన్పూర్, ఆగస్టు 7 (నవజ్యోతి ప్రతినిధి): జూబ్లీహిల్స్ పోలీస్స్టేషన్కు చెందిన సీఐ శ్రీనివాస్రెడ్డిపై అత్యాచారం, లైంగిక వేధింపులు, బెదిరింపులు తదితర ఆరోపణలతో అమీన్పూర్ పోలీస్స్టేషన్లో కేసు నమోదైంది.
బీరంగూడ జయలక్ష్మి నగర్కు చెందిన ఓ మహిళ ఇచ్చిన ఫిర్యాదు మేరకు పోలీసులు కేసు నమోదు చేశారు. కుటుంబ వివాదం సందర్భంగా పోలీస్స్టేషన్కు వెళ్లిన సమయంలో న్యాయం చేస్తానని నమ్మబలికి, తన సమ్మతి లేకుండా లైంగికంగా వేధించాడని బాధితురాలు ఫిర్యాదులో పేర్కొంది. ఆ ఘటనతో గర్భం దాల్చగా, అనంతరం బలవంతంగా గర్భస్రావం చేయించాడని, తరచూ పిలిచి వేధించడంతో పాటు దాడి చేసి డబ్బులు కూడా తీసుకున్నాడని ఆరోపించింది.
బాధితురాలి ఫిర్యాదు ఆధారంగా భారతీయ న్యాయ సంహిత (బీఎన్ఎస్)లోని పలు సెక్షన్లతో పాటు సమాచార సాంకేతిక చట్టంలోని 66(E), 67, 67(A) సెక్షన్ల కింద అమీన్పూర్ పోలీసులు కేసు నమోదు చేసి దర్యాప్తు ప్రారంభించారు. బాధితురాలి వాంగ్మూలాన్ని నమోదు చేసినట్లు అధికారులు తెలిపారు.
కేసుకు సంబంధించిన సాక్ష్యాధారాలను సేకరిస్తున్నామని, దర్యాప్తులో వెలుగులోకి వచ్చే ఆధారాల ప్రకారం తదుపరి చట్టపరమైన చర్యలు తీసుకుంటామని పోలీసులు తెలిపారు. ఈ కేసులో చేసిన ఆరోపణల నిజానిజాలు దర్యాప్తులో తేలాల్సి ఉంది.
కాగా, ఇదే అధికారిపై గతంలో కూడా లైంగిక వేధింపుల ఆరోపణలు రావడంతో అప్పటి సైబరాబాద్ పోలీస్ కమిషనర్ సజ్జనార్ సస్పెండ్ చేసిన విషయం తెలిసిందే.
