జాతీయ ఉత్తమ ఉపాధ్యాయ అవార్డుల్లో తెలుగు రాష్ట్రాల ప్రతిభ !

21 మంది అధ్యాపకులకు జాతీయ పురస్కారాలు

న్యూఢిల్లీ, ఆగస్టు 25 (నవజ్యోతి ప్రతినిధి): ఉన్నత విద్యా సంస్థలు – పాలిటెక్నిక్‌లకు చెందిన 21 మంది అధ్యాపకులను 2026 జాతీయ ఉత్తమ ఉపాధ్యాయ పురస్కారాలకు కేంద్ర విద్యాశాఖ ఎంపిక చేసింది. సెప్టెంబర్‌ 5న ఉపాధ్యాయ దినోత్సవం సందర్భంగా న్యూఢిల్లీలోని విజ్ఞాన్‌ భవన్‌లో రాష్ట్రపతి ద్రౌపది ముర్ము అవార్డులను ప్రదానం చేయనున్నారు.

ఈ జాబితాలో తెలుగు రాష్ట్రాలకు చెందిన ముగ్గురు అధ్యాపకులు చోటు దక్కించుకున్నారు. ఐఐటీ హైదరాబాద్‌కు చెందిన ప్రొఫెసర్‌ కీర్తి చంద్ర సాహు, ఏఐఐఎంఎస్‌ మంగళగిరికి చెందిన డాక్టర్‌ అరుణ్‌ బాబు, ఐఐటీ భువనేశ్వర్‌కు చెందిన డాక్టర్‌ శ్రీకాంత్‌ గొల్లపూడి జాతీయ పురస్కారాలకు ఎంపికయ్యారు.

ఐఐటీ హైదరాబాద్‌ ప్రొఫెసర్‌ కీర్తి చంద్ర సాహు

ప్రొఫెసర్‌ కీర్తి చంద్ర సాహు ఐఐటీ హైదరాబాద్‌ ప్రారంభ దశ నుంచి పనిచేస్తున్న అధ్యాపకుల్లో ఒకరు. విద్యా ప్రణాళిక రూపకల్పన – విద్యార్థులకు మార్గదర్శకత్వం – పరిశోధన రంగాల్లో ఆయన సేవలకు గుర్తింపు లభించింది. పర్యావరణం – వర్షపాతం అంచనాలకు సంబంధించిన ఆయన పరిశోధనలు ప్రత్యేకంగా గుర్తింపు పొందాయి. ఆయన రూపొందించిన వర్షపాతం అంచనా ప్రయోగాలను వాతావరణ శాఖ వాతావరణ సూచనల కచ్చితత్వాన్ని మెరుగుపరచేందుకు ఉపయోగిస్తున్నట్లు సమాచారం.

ఏఐఐఎంఎస్‌ మంగళగిరి వైద్యుడికి గుర్తింపు

ఏఐఐఎంఎస్‌ మంగళగిరి పీడియాట్రిక్స్‌ విభాగానికి చెందిన డాక్టర్‌ అరుణ్‌ బాబు నవజాత శిశువులు – పిల్లల వైద్య సేవల్లో చేసిన కృషికి అవార్డుకు ఎంపికయ్యారు. రెండు ఆవిష్కరణలకు పేటెంట్లు పొందడంతో పాటు వైద్యులు గర్భధారణ వయసును సులభంగా లెక్కించేందుకు ఉపయోగపడే ‘POG CALC’ మొబైల్‌ అప్లికేషన్‌ను రూపొందించారు. ఆంధ్రప్రదేశ్‌ స్టేట్‌ పీడియాట్రిక్‌ కోవిడ్‌-19 టాస్క్‌ఫోర్స్‌లోనూ సభ్యుడిగా పనిచేశారు.

ఐఐటీ భువనేశ్వర్‌ అధ్యాపకుడికీ పురస్కారం

ఐఐటీ భువనేశ్వర్‌ మెటలర్జీ – మెటీరియల్స్‌ ఇంజినీరింగ్‌ విభాగానికి చెందిన డాక్టర్‌ శ్రీకాంత్‌ గొల్లపూడి కూడా ఎంపికయ్యారు. విశాఖపట్నంలో పెరిగిన ఆయనకు తెలుగు రాష్ట్రాలతో కుటుంబ అనుబంధం ఉంది. ఎన్‌ఐటీ రూర్కెలాలో బీఈ – ఐఐఎస్‌సీ బెంగళూరులో ఎంఈ – అమెరికాలోని నార్త్‌ కరోలినా స్టేట్‌ యూనివర్సిటీలో మెటీరియల్స్‌ సైన్స్‌ అండ్‌ ఇంజినీరింగ్‌లో పీహెచ్‌డీ చేశారు.

21 మంది ఎంపిక

ఈ ఏడాది ఎంపికైన 21 మందిలో 12 మంది కేంద్ర ఉన్నత విద్యా సంస్థలకు, ఐదుగురు రాష్ట్ర విశ్వవిద్యాలయాలకు, నలుగురు పాలిటెక్నిక్‌ సంస్థలకు చెందినవారు. బోధన – పరిశోధన – ఆవిష్కరణలు – విద్యార్థులకు చేరువయ్యే కార్యక్రమాలు – అకడమిక్‌ నాయకత్వం వంటి అంశాల ఆధారంగా ఎంపిక ప్రక్రియ నిర్వహించినట్లు విద్యాశాఖ వివరించింది.

2023 నుంచి ఉన్నత విద్యా అధ్యాపకులకు అవార్డులు

2023 నుంచి ఉన్నత విద్యా సంస్థలు – పాలిటెక్నిక్‌ల అధ్యాపకులకు కూడా జాతీయ ఉపాధ్యాయ పురస్కారాల పరిధిని విస్తరించారు. జాతీయ విద్యా విధానం-2020లో పేర్కొన్న విద్యా రంగంలో ప్రతిభకు ప్రోత్సాహం కల్పించే లక్ష్యంతో ఈ విభాగాన్ని ప్రవేశపెట్టారు.