నిపుణులతో కమిటీలు.. ప్రత్యేక వార్రూమ్.. దేశ, విదేశాల్లో రోడ్షోలు
హైదరాబాద్, ఆగస్టు 26 (నవజ్యోతి ప్రతినిధి):
తెలంగాణలో పెట్టుబడులను మరింతగా ఆకర్షించేందుకు నిర్వహించనున్న తెలంగాణ రైజింగ్–ఇన్వెస్ట్ తెలంగాణ గ్లోబల్ సమ్మిట్–2026 ఏర్పాట్లపై రాష్ట్ర ప్రభుత్వం దృష్టి సారించింది. ఉప ముఖ్యమంత్రి భట్టి విక్రమార్క అధ్యక్షతన మహాత్మా ఫూలే ప్రజాభవన్లో జరిగిన క్యాబినెట్ సబ్ కమిటీ సమావేశంలో సమ్మిట్ ఏర్పాట్లు, పెట్టుబడుల ఆకర్షణ వ్యూహంపై సమీక్ష నిర్వహించారు. ప్రభుత్వ ప్రధాన కార్యదర్శి సంజయ్ జాజు సహా పలువురు ఉన్నతాధికారులు సమావేశంలో పాల్గొన్నారు.
ప్రత్యేక వార్రూమ్ ఏర్పాటు
సమ్మిట్ ఏర్పాట్లను వేగంగా పూర్తి చేసేందుకు ప్రత్యేక వార్రూమ్ ఏర్పాటు చేయాలని సమావేశంలో నిర్ణయించారు. సమ్మిట్కు సంబంధించిన వివిధ అంశాలను నిరంతరం పర్యవేక్షిస్తూ, నిర్ణీత గడువులో పనులు పూర్తయ్యేలా సమన్వయం చేయనున్నారు. నిపుణులు, కీలక అధికారులతో సమ్మిట్ కమిటీలను మరింత బలోపేతం చేయాలని నిర్ణయించారు.
పెట్టుబడిదారులకు ఆహ్వానాలు
దేశ, విదేశాలకు చెందిన ప్రముఖ పారిశ్రామికవేత్తలు, పెట్టుబడిదారులను సమ్మిట్కు ఆహ్వానించే ప్రక్రియను వేగవంతం చేయాలని అధికారులు సూచించారు. తెలంగాణలో పెట్టుబడులకు ఉన్న అవకాశాలను వివరించేందుకు దేశీయంగా, అంతర్జాతీయంగా రోడ్షోలు నిర్వహించాలని నిర్ణయించారు.
గత ఒప్పందాలపై ప్రత్యేక సమీక్ష
గతంలో రాష్ట్ర ప్రభుత్వం వివిధ సంస్థలతో కుదుర్చుకున్న అవగాహన ఒప్పందాల పురోగతిపైనా సమావేశంలో చర్చించారు. కుదిరిన ఒప్పందాల్లో ఎన్ని కార్యరూపం దాల్చాయి, ఎక్కడ సమస్యలు ఉన్నాయి, పెట్టుబడులను వాస్తవ ప్రాజెక్టులుగా మార్చేందుకు తీసుకోవాల్సిన చర్యలపై సమగ్ర సమీక్ష చేపట్టాలని నిర్ణయించారు.
కీలక రంగాల్లో పెట్టుబడులపై దృష్టి
సాంకేతికత, ఔషధాలు, జీవశాస్త్రాలు, ఏరోస్పేస్, రక్షణ, సెమీకండక్టర్లు, తయారీ, పునరుత్పాదక ఇంధనం తదితర రంగాల్లో పెట్టుబడులను ఆకర్షించేందుకు ప్రత్యేక కార్యాచరణ రూపొందించనున్నారు. తెలంగాణను దేశీయ, అంతర్జాతీయ పెట్టుబడులకు మరింత అనుకూలమైన గమ్యస్థానంగా తీర్చిదిద్దడమే లక్ష్యంగా ప్రభుత్వం ముందుకు సాగుతోంది.
పెట్టుబడులు.. ఉపాధి అవకాశాలే లక్ష్యం
కొత్త పెట్టుబడులను రాష్ట్రానికి తీసుకురావడంతో పాటు గతంలో ప్రకటించిన పెట్టుబడులను వేగంగా కార్యరూపంలోకి తీసుకురావడంపై ప్రభుత్వం ప్రధానంగా దృష్టి పెట్టింది. పెట్టుబడుల ద్వారా పారిశ్రామిక అభివృద్ధి, ఉపాధి అవకాశాలు పెంచడం, తెలంగాణ ఆర్థిక వ్యవస్థను మరింత బలోపేతం చేయడమే సమ్మిట్ ప్రధాన లక్ష్యంగా ప్రభుత్వం భావిస్తోంది.
సమ్మిట్ కోసం ప్రధాన కార్యాచరణ: నిపుణులతో కమిటీల బలోపేతం, ప్రత్యేక వార్రూమ్ ఏర్పాటు, పెట్టుబడిదారులకు ఆహ్వానాలు, గత అవగాహన ఒప్పందాల పురోగతి సమీక్ష, దేశీయ–అంతర్జాతీయ రోడ్షోలు నిర్వహించడం.
