ముంబై, ఆగస్టు 23 (నవజ్యోతి ప్రతినిధి):

గణేశ్‌ వేడుకల నేపథ్యంలో ముంబైలో విషాద ఘటన చోటుచేసుకుంది. భులేశ్వర్‌ ప్రాంతంలోని
జయ్‌ అంబే చౌక్‌ సమీపంలో శనివారం రాత్రి ‘భులేశ్వర్‌చా రాజా’ 22 అడుగుల
గణేశ్‌ విగ్రహం తరలింపు కార్యక్రమంలో ఒక్కసారిగా కూలిపోయింది.
ఈ ప్రమాదంలో ఇద్దరు మృతి చెందగా, ఐదుగురు గాయపడ్డారు.

బలరామ్‌ మర్చంట్‌ రోడ్‌, డాక్టర్‌ ఆత్మారామ్‌ మర్చంట్‌ రోడ్‌ ప్రాంతంలో విగ్రహాన్ని
తరలిస్తుండగా ఈ ప్రమాదం జరిగినట్లు అధికారులు తెలిపారు. పండల్‌కు చేరుకోవడానికి
కొద్దిదూరం ముందు విగ్రహం అదుపుతప్పి కిందపడినట్లు సమాచారం.

ఈ ఘటనలో సంకేత్‌ నెవ్షే (33), బృజేష్‌ హేమంత్‌ జోషి (30)
మృతి చెందినట్లు అధికారులు గుర్తించారు. విగ్రహం కింద చిక్కుకుని తీవ్రంగా
గాయపడిన వీరిని ఆసుపత్రికి తరలించినప్పటికీ ప్రాణాలు నిలవలేదు.

గాయపడిన ఐదుగురిలో 5, 7 ఏళ్ల ఇద్దరు బాలికలు కూడా ఉన్నారు.
మరో ముగ్గురికి గాయాలయ్యాయి. గాయపడిన వారందరి పరిస్థితి ప్రస్తుతం
స్థిరంగా ఉన్నట్లు అధికారులు తెలిపారు.

ప్రాథమిక సమాచారం ప్రకారం విగ్రహాన్ని మోస్తున్న ఫ్రేమ్‌లోని
నట్స్‌, బోల్ట్స్‌ సరిగా బిగించకపోవడం లేదా ఫ్రేమ్‌ నిర్మాణంలో లోపం
ఉండి ఉండొచ్చని అనుమానిస్తున్నారు. అయితే ప్రమాదానికి అసలు కారణం
దర్యాప్తు పూర్తయిన తర్వాతే స్పష్టమవుతుంది.

ప్రమాదం జరిగిన వెంటనే ముంబై ఫైర్‌ బ్రిగేడ్‌, పోలీసులు, ట్రాఫిక్‌ పోలీసులు,
బీఎంసీ సిబ్బంది, 108 అంబులెన్స్‌ బృందాలు ఘటనాస్థలికి చేరుకుని సహాయక చర్యలు
చేపట్టాయి. గాయపడిన వారిని ఆసుపత్రులకు తరలించారు.

ఘటనపై డీబీ మార్గ్‌ పోలీసులు విచారణ చేపట్టారు. యాక్సిడెంటల్‌
డెత్‌ రిపోర్ట్‌ నమోదు చేసి ప్రమాదానికి దారితీసిన పరిస్థితులపై వివరాలు
సేకరిస్తున్నారు. విగ్రహం ఏర్పాటు చేసిన ఫ్రేమ్‌, దాని భద్రతా ప్రమాణాలు,
తరలింపు సమయంలో తీసుకున్న జాగ్రత్తలను పరిశీలించే అవకాశం ఉంది.