కార్పొరేట్ సంస్థలకు MA&UD, HYDRAA పిలుపు
హైదరాబాద్, ఆగస్టు 11 (నవజ్యోతి ప్రతినిధి): హైదరాబాద్లోని చెరువుల అభివృద్ధి, పునరుద్ధరణకు కార్పొరేట్ సంస్థలు సీఎస్ఆర్ (CSR) నిధులతో భాగస్వాములు కావాలని మున్సిపల్ అడ్మినిస్ట్రేషన్ అండ్ అర్బన్ డెవలప్మెంట్ (MA&UD) శాఖ పిలుపునిచ్చింది.
నగర చెరువుల అభివృద్ధి, పునరుద్ధరణలో కార్పొరేట్ భాగస్వామ్యాన్ని మరింత బలోపేతం చేసే లక్ష్యంతో MA&UD, క్రీడల శాఖ ఆధ్వర్యంలో నిర్వహించిన CSR Round Table 2.0 కార్యక్రమంలో ఈ పిలుపునిచ్చారు.
MA&UD ప్రత్యేక ప్రధాన కార్యదర్శి జయేష్ రంజన్, HYDRAA కమిషనర్ ఏ.వి. రంగనాథ్ కార్పొరేట్ సంస్థలు తమ సీఎస్ఆర్ కార్యక్రమాల ద్వారా నగరంలోని చిన్న చెరువుల అభివృద్ధికి సహకరించాలని కోరారు.
నగర పర్యావరణ సమతుల్యతను కాపాడటంలో, భవిష్యత్తులో నీటి అవసరాలను తీర్చడంలో, పట్టణ వరదల ప్రభావాన్ని తగ్గించడంలో చెరువులు కీలక పాత్ర పోషిస్తాయని అధికారులు తెలిపారు. హైదరాబాద్ను సుస్థిర నగరంగా తీర్చిదిద్దేందుకు జలవనరుల పరిరక్షణ, పునరుద్ధరణ అత్యవసరమని పేర్కొన్నారు.
HYDRAA కమిషనర్ ఏ.వి. రంగనాథ్ తొలి, రెండో దశల్లో HYDRAA చేపట్టిన చెరువుల అభివృద్ధి పనులపై పవర్పాయింట్ ప్రజెంటేషన్ ఇచ్చారు. చెరువుల అభివృద్ధి పనుల మూడో దశకు ప్రభుత్వం ఆమోదం తెలిపిందని ఆయన వెల్లడించారు. దీంతో నగరంలోని మరిన్ని జలవనరుల పునరుద్ధరణకు మార్గం సుగమమైందని తెలిపారు.
భవిష్యత్ తరాల కోసం హైదరాబాద్ చెరువులను అభివృద్ధి చేసి పరిరక్షించేందుకు కార్పొరేట్ సంస్థలు, ప్రజలు ప్రభుత్వ సంస్థలతో కలిసి పనిచేయాలని రంగనాథ్ కోరారు.
సీఎస్ఆర్ కార్యక్రమాల ద్వారా, ముఖ్యంగా చిన్న చెరువుల అభివృద్ధిలో కార్పొరేట్ సంస్థల భాగస్వామ్యం పెరగడం వల్ల పర్యావరణ పరిరక్షణతోపాటు సుస్థిర, వరదలను తట్టుకునే హైదరాబాద్ నిర్మాణానికి గణనీయమైన తోడ్పాటు అందుతుందని అధికారులు పేర్కొన్నారు.
ప్రభుత్వం, కార్పొరేట్ రంగం, ప్రజలు కలిసి పనిచేస్తే హైదరాబాద్ చెరువుల పరిరక్షణతోపాటు నగర పర్యావరణ, నీటి భద్రతను మరింత బలోపేతం చేయవచ్చని అధికారులు తెలిపారు.
