హైదరాబాద్‌, ఆగస్టు 15 (నవజ్యోతి ప్రతినిధి): రాష్ట్రంలోని యూనిఫాం సర్వీసుల ఉద్యోగాల భర్తీకి నిరుద్యోగులకు ప్రభుత్వం మరో అవకాశం కల్పించింది. పోలీస్‌, ఫైర్‌, జైళ్లు, స్పెషల్‌ ప్రొటెక్షన్‌ ఫోర్స్‌ (ఎస్పీఎఫ్‌), ఎక్సైజ్‌, రవాణా, అటవీ శాఖల్లో ప్రత్యక్ష నియామకాలకు నిర్దేశించిన గరిష్ఠ వయోపరిమితిని మరో రెండేళ్లు పెంచుతూ ప్రభుత్వం ఉత్తర్వులు జారీ చేసింది.
ఈ మేరకు సాధారణ పరిపాలన శాఖ జీవోఎంఎస్‌ నంబర్‌ 122ను ఈ నెల 14న విడుదల చేసింది. గతంలో ఇదే పోస్టులకు గరిష్ఠ వయోపరిమితిని ఐదేళ్లు పెంచుతూ మే 18న ప్రభుత్వం ఉత్తర్వులు జారీ చేసింది. తాజాగా దానికి అదనంగా మరో రెండేళ్ల సడలింపు ఇచ్చింది.
నిరుద్యోగుల విజ్ఞప్తులతో నిర్ణయం
యూనిఫాం సర్వీసుల ఉద్యోగాల కోసం వయోపరిమితి సడలించాలని నిరుద్యోగ యువత నుంచి వచ్చిన విజ్ఞప్తులను పరిశీలించిన ప్రభుత్వం ఈ నిర్ణయం తీసుకుంది. తాజా సడలింపు తదుపరి ప్రత్యక్ష నియామకాలకు వర్తించనుంది.
ఐదేళ్లకు అదనంగా మరో రెండేళ్లు
ఈ ఉత్తర్వుల ప్రకారం పోలీస్‌, ఫైర్‌, జైళ్లు, ఎస్పీఎఫ్‌, ఎక్సైజ్‌, రవాణా, అటవీ శాఖల్లో నియామకాలకు నిర్దేశించిన గరిష్ఠ వయోపరిమితికి ఇప్పటికే ఇచ్చిన ఐదేళ్ల సడలింపుతో పాటు మరో రెండేళ్లు అదనంగా పెరుగుతుంది. దీంతో యూనిఫాం ఉద్యోగాల కోసం ఎదురుచూస్తున్న నిరుద్యోగులకు మరింత మంది పోటీ పడే అవకాశం లభించనుంది. తాజా ఉత్తర్వులను తెలంగాణ స్టేట్‌ లెవల్‌ పోలీస్‌ రిక్రూట్‌మెంట్‌ బోర్డు, తెలంగాణ పబ్లిక్‌ సర్వీస్‌ కమిషన్‌ తదితర సంబంధిత శాఖలకు ప్రభుత్వం పంపింది.
