రాంపల్లి–చెర్లపల్లి రోడ్డుపై షెడ్ల నిర్మాణాలపై సందేహాలు

అనుమతులపై స్పష్టత ఇవ్వాలని స్థానికుల డిమాండ్..

ఘట్‌కేసర్ సర్కిల్–6 నాగారం డివిజన్ పరిధిలోని రాంపల్లి–చెర్లపల్లి ప్రధాన రహదారిపై కొనసాగుతున్న షెడ్ల నిర్మాణాలు స్థానికంగా చర్చనీయాంశంగా మారాయి. ప్రధాన రహదారికి ఆనుకుని నిర్మాణాలు జరుగుతుండటంతో వాటికి అవసరమైన అనుమతులు, నిబంధనల అమలుపై ప్రజలు సందేహాలు వ్యక్తం చేస్తున్నారు.

టౌన్ ప్లానింగ్ తనిఖీలు నిర్వహించాలని విజ్ఞప్తి

నిర్మాణాల విషయంలో సంబంధిత టౌన్ ప్లానింగ్ అధికారులు క్షేత్రస్థాయిలో తనిఖీలు నిర్వహించి నిబంధనల అమలును పరిశీలించాలని స్థానికులు కోరుతున్నారు. అన్ని అనుమతులు సక్రమంగా ఉంటే అధికారికంగా వెల్లడించాలని, ఒకవేళ నిబంధనలకు విరుద్ధంగా నిర్మాణాలు జరుగుతున్నట్లు తేలితే చట్టప్రకారం చర్యలు తీసుకోవాలని విజ్ఞప్తి చేస్తున్నారు.

అధికారుల స్పందన కోసం ఎదురుచూపు

ఈ అంశంపై సంబంధిత శాఖల నుంచి ఇప్పటివరకు ఎలాంటి అధికారిక వివరణ వెలువడకపోవడంతో స్థానికుల్లో మరిన్ని సందేహాలు వ్యక్తమవుతున్నాయి. నిర్మాణాలకు సంబంధించిన వాస్తవ పరిస్థితిపై అధికారులు స్పందించి స్పష్టత ఇవ్వాలని ప్రజలు కోరుతున్నారు.