వరుసగా ఆడపిల్లలు పుట్టడంతో కుటుంబంలో గొడవలు.. అత్తింటి వేధింపులపై బంధువుల ఆరోపణలు
నల్లగొండ, ఆగస్టు 12 (నవజ్యోతి ప్రతినిధి): నల్లగొండ జిల్లా ప్రభుత్వ ఆసుపత్రి ఆవరణలో విషాద ఘటన చోటుచేసుకుంది. మునుగోడు మండలం చీకటి మామిడి గ్రామానికి చెందిన బాలింత మమత ఆత్మహత్యకు పాల్పడ్డారు. వారం రోజుల క్రితం ఆమెకు ప్రసవం కాగా.. వరుసగా నాలుగోసారి కూడా ఆడపిల్లే పుట్టడంతో ఈ విషాద ఘటన చోటుచేసుకున్నట్లు సమాచారం.
మమత ప్రసవం కోసం నల్లగొండ జిల్లా ప్రభుత్వ ఆసుపత్రిలో చేరారు. వారం రోజుల క్రితం ఆమెకు ప్రసవం జరిగింది. ఇప్పటికే ముగ్గురు ఆడపిల్లలు ఉండగా.. నాలుగో సంతానంగా కూడా ఆడపిల్ల పుట్టింది. దీంతో ఆమె తీవ్ర ఆవేదనకు గురైనట్లు సమాచారం. అనంతరం ఆసుపత్రి ఆవరణలోని చెట్టుకు ఉరేసుకుని ఆత్మహత్యకు పాల్పడ్డారు.
వరుసగా ఆడపిల్లలు పుట్టడంతో కుటుంబంలో కొంతకాలంగా గొడవలు జరుగుతున్నాయని మమత బంధువులు ఆరోపించారు. అత్తింటి వేధింపులే ఆమె ఆత్మహత్యకు కారణమని పోలీసులకు ఫిర్యాదు చేసినట్లు సమాచారం. అయితే ఈ ఆరోపణలు ఇంకా దర్యాప్తులోనే ఉన్నాయి.
ఆధునిక సమాజంలోకి అడుగులు వేస్తున్నామని చెప్పుకుంటున్న సమయంలో ఆడపిల్ల పుట్టిందనే కారణంతో వివక్ష చూపడం కలవరపరిచే విషయం. పిల్లలు కలగాలని కోరుకుంటూ, సంతానం కోసం ఎన్నో కుటుంబాలు ఎదురుచూస్తున్న వేళ.. పుట్టిన బిడ్డ ఆడపిల్ల అని సంతోషించకుండా ఆమెను భారంగా చూడటం బాధాకరం.
ముఖ్యంగా మారుమూల పల్లె ప్రాంతాల్లో ఆడపిల్లలపై వివక్ష, లింగ అసమానత, బాలికల విలువపై మరింత విస్తృతంగా అవగాహన కల్పించాల్సిన అవసరం ఉంది. ఆడపిల్ల పుట్టడం లోపం కాదు.. అది కుటుంబానికి, సమాజానికి ఒక వరం. ఆడపిల్లలను సమానంగా గౌరవించి, వారికి అబ్బాయిలతో సమాన అవకాశాలు కల్పించాల్సిన బాధ్యత ప్రతి కుటుంబంపైన, సమాజంపైన ఉంది.
ఒకవైపు పిల్లలు లేక పెళ్లిళ్లు కాక ఎంతోమంది బాధపడుతుంటే.. మరోవైపు ఆడపిల్ల పుట్టిందని వివక్ష చూపడం ఎంతటి విషాదం? ఈ ఘటన సమాజం ఆలోచనా విధానాన్ని మరోసారి ప్రశ్నిస్తోంది. ఆడపిల్ల పుట్టినప్పుడు బాధపడే పరిస్థితి మారాలి.. ఆమె పుట్టుకను ఆనందంగా స్వీకరించే మార్పు ప్రతి ఇంటి నుంచి మొదలుకావాలి.
ఆడపిల్లల పట్ల వివక్షను రూపుమాపేందుకు ప్రభుత్వాలు, ప్రజాప్రతినిధులు, స్వచ్ఛంద సంస్థలు మాత్రమే కాకుండా ప్రతి కుటుంబం, ప్రతి గ్రామం స్థాయిలో అవగాహన కార్యక్రమాలు నిర్వహించాల్సిన అవసరం ఉందనే చర్చకు ఈ ఘటన దారితీస్తోంది.
