20 సెకన్లలోనే మరో దాడి

పోలీసుల వివరాల ప్రకారం.. సోమవారం సాయంత్రం సుమారు 4:24 గంటలకు టైమ్స్‌ స్క్వేర్‌లో రెండు కత్తులతో ఓ మహిళ పలువురిపై దాడి చేస్తున్నట్లు 911కు వరుసగా కాల్స్‌ వచ్చాయి. వెస్ట్‌ 41వ స్ట్రీట్‌, సెవెన్త్‌ అవెన్యూ సమీపంలో సిస్నెరోస్‌ షాపింగ్‌ బ్యాగ్‌ నుంచి రెండు పెద్ద కత్తులు తీసింది.

ముందుగా 68 ఏళ్ల వ్యక్తి పొట్టలో కత్తితో పొడిచిన ఆమె.. కేవలం 20 సెకన్ల వ్యవధిలో అక్కడి నుంచి వెళ్తున్న ఎరిన్‌ పియాసెంటిపై కూడా దాడి చేసినట్లు పోలీసులు తెలిపారు.

పోలీసులపైకి కత్తులతో దూసుకెళ్లిన నిందితురాలు

దాడి అనంతరం పోలీసులు సిస్నెరోస్‌ను చుట్టుముట్టి కత్తులు కింద పెట్టాలని పలుమార్లు హెచ్చరించారు. సుమారు నాలుగు నిమిషాలపాటు లొంగిపోవాలని కోరినప్పటికీ ఆమె నిరాకరించినట్లు అధికారులు తెలిపారు.

టేసర్‌తో అదుపులోకి తీసుకునే ప్రయత్నం చేసినా ఆమె కత్తులతో పోలీసుల వైపు ముందుకు రావడంతో ఇద్దరు పోలీసులు కాల్పులు జరిపారు. అనంతరం ఆమెను ఆసుపత్రికి తరలించగా మృతి చెందినట్లు అధికారులు తెలిపారు.

ఉగ్రవాద కోణం లేదని ప్రాథమిక సమాచారం

పోలీసులు ఈ దాడిని ప్రాథమికంగా యాదృచ్ఛిక, ప్రేరేపణలేని దాడిగా పేర్కొన్నారు. ఇప్పటివరకు ఉగ్రవాద సంబంధం ఉన్నట్లు ఎలాంటి ఆధారం వెల్లడించలేదు. దాడికి దారితీసిన కారణాలు, నిందితురాలి ఉద్దేశం తదితర అంశాలపై దర్యాప్తు కొనసాగుతోంది.