నల్గొండ, ఆగస్టు 23 (నవజ్యోతి ప్రతినిధి):
నల్గొండ పట్టణాన్ని సూపర్‌ స్మార్ట్‌ సిటీగా తీర్చిదిద్దడమే లక్ష్యంగా
మౌలిక వసతుల అభివృద్ధికి పెద్దపీట వేస్తున్నామని రాష్ట్ర రోడ్లు, భవనాలు,
సినిమాటోగ్రఫీ శాఖ మంత్రి కోమటిరెడ్డి వెంకట్‌రెడ్డి అన్నారు.
నియోజకవర్గంలో అన్ని రంగాల్లో అభివృద్ధిని వేగవంతం చేసేందుకు పలు భారీ
ప్రాజెక్టులు చేపడుతున్నట్లు తెలిపారు.

ఆదివారం నల్గొండ క్లబ్‌లో రూ.2 కోట్లతో నిర్మించిన అదనపు గదులు,
కాన్ఫరెన్స్‌ హాల్‌ను మంత్రి ప్రారంభించారు. నల్గొండ క్లబ్‌
ఆహ్లాదకర వాతావరణంలో ఉందని, పట్టణ ప్రజలకు ఎంతో ఉపయోగకరంగా ఉంటుందని
అన్నారు. క్లబ్‌ అభివృద్ధికి ప్రభుత్వం తరఫున సహకారం అందిస్తామని హామీ ఇచ్చారు.

నల్గొండ పట్టణానికి 24 గంటల పాటు తాగునీరు అందించేందుకు
రూ.125 కోట్ల అంచనా వ్యయంతో పనులు
చేపట్టినట్లు మంత్రి తెలిపారు. ఈ పనులను ఆరు నెలల్లో పూర్తి చేసి
పట్టణ ప్రజలకు నిరంతర తాగునీటి సరఫరా అందించేందుకు చర్యలు తీసుకుంటున్నామని చెప్పారు.

ఎస్‌ఎల్‌బీసీ సొరంగం పూర్తి చేయడం తన ప్రధాన ప్రాధాన్యాల్లో ఒకటని
కోమటిరెడ్డి వెంకట్‌రెడ్డి తెలిపారు. ముఖ్యమంత్రి ఎ. రేవంత్‌రెడ్డి
ఇచ్చిన హామీ మేరకు నిధులు సమీకరించి పనులను వేగవంతం చేస్తున్నామని,
నీటిపారుదల శాఖ మంత్రి ఎన్‌. ఉత్తమ్‌కుమార్‌రెడ్డి
సహకారంతో ప్రాజెక్టును ముందుకు తీసుకెళ్తున్నామని చెప్పారు.

ప్రాజెక్టు అంచనా వ్యయం రూ.2 వేల కోట్ల నుంచి రూ.5 వేల కోట్లకు
పెరిగిందని, ఇప్పటికే సొరంగం పనుల్లో గణనీయమైన పురోగతి సాధించామని మంత్రి
వివరించారు.

నల్గొండ పట్టణ అభివృద్ధిలో భాగంగా
రూ.900 కోట్లతో ఔటర్‌ రింగ్‌ రోడ్డు నిర్మిస్తున్నట్లు మంత్రి తెలిపారు.
ట్రాఫిక్‌ రద్దీని తగ్గించి పట్టణాన్ని ఆధునిక, ఆకర్షణీయ నగరంగా తీర్చిదిద్దేందుకు
రహదారి అభివృద్ధిపై ప్రత్యేక దృష్టి పెట్టామని చెప్పారు.

పట్టణంలో రూ.300 కోట్లతో అండర్‌గ్రౌండ్‌
డ్రైనేజీ వ్యవస్థ అభివృద్ధి చేయనున్నట్లు మంత్రి తెలిపారు.
ప్రతి వార్డులో సీసీ రోడ్లు, డబుల్‌ రోడ్లు నిర్మించి మౌలిక వసతులను
మరింత మెరుగుపరుస్తామని చెప్పారు.

ప్రతి ఎకరాకు సాగునీరు అందించాలనే లక్ష్యంతో రాష్ట్రంలోని సాగునీటి
ప్రాజెక్టుల పనులను వేగవంతం చేస్తున్నామని మంత్రి కోమటిరెడ్డి వెంకట్‌రెడ్డి
తెలిపారు.