కాంగ్రెస్‌ నేతపై హత్యాయత్నం కలకలం!

కుత్బుల్లాపూర్‌, సెప్టెంబర్‌ 3 (నవజ్యోతి ప్రతినిధి):
బాచుపల్లి పోలీస్‌స్టేషన్‌ పరిధిలోని జి.పి.ఆర్‌. లేఅవుట్‌లో
కాంగ్రెస్‌ నేత, మాజీ టీపీసీసీ ప్రధాన కార్యదర్శి నర్సారెడ్డి భూపతి రెడ్డి సోదరుడు వీరారెడ్డిపై
హత్యాయత్నం జరిగినట్లు సమాచారం కలకలం రేపింది. బుధవారం రాత్రి సుమారు
9.10 గంటల సమయంలో ఆయన కార్యాలయం వద్ద నిలిపి ఉంచిన కారుపై గుర్తుతెలియని
వ్యక్తులు పెట్రోల్‌ పోసి నిప్పంటించిన ఘటన తీవ్ర ఉత్కంఠకు దారితీసింది.

కార్యాలయం వద్ద నిలిపి ఉన్న కారులో మంటలు ఎగసిపడటాన్ని వీరారెడ్డి గమనించారు.
వెంటనే కేకలు వేయడంతో అక్కడి నుంచి దుండగులు పరుగులు తీసినట్లు తెలిసింది.
దీంతో పరిసరాల్లో ఒక్కసారిగా భయాందోళన నెలకొంది.

సమాచారం అందుకున్న బాచుపల్లి పోలీసులు హుటాహుటిన ఘటనాస్థలికి చేరుకుని పరిస్థితిని
పరిశీలించారు. వివరాలు సేకరించిన పోలీసులు సీసీ కెమెరా ఫుటేజీలను పరిశీలిస్తూ
దుండగుల కదలికలను గుర్తించే పనిలో నిమగ్నమయ్యారు. నిందితుల కోసం గాలింపు చర్యలు చేపట్టారు.

ఇది సాధారణంగా కారుకు నిప్పంటించిన ఘటననా? లేక
వీరారెడ్డినే లక్ష్యంగా చేసుకుని పక్కా ప్రణాళికతో చేసిన దాడా?
అనే కోణంలో పోలీసులు దర్యాప్తు చేస్తున్నారు. వ్యాపార లావాదేవీల వివాదం ఏమైనా ఉందా?
పాత కక్షల కారణమా? ఇతర వ్యక్తిగత కారణాలేమైనా ఉన్నాయా? అనే కోణాలను కూడా పరిశీలిస్తున్నట్లు సమాచారం.

పోలీసుల దర్యాప్తు కొనసాగుతోంది:
ఘటనకు సంబంధించిన పూర్తి కారణాలు, నిందితుల వివరాలు దర్యాప్తు పూర్తయిన తర్వాత
వెల్లడయ్యే అవకాశం ఉంది. ప్రస్తుతానికి ఘటనపై పోలీసులు దర్యాప్తు కొనసాగిస్తున్నారు.