అంచనాలను మించి ‘రామాయణం’ ట్రైలర్.. సోషల్ మీడియాలో ప్రశంసల వెల్లువ

నమిత్ మల్హోత్రా నిర్మాణంలో, నితేశ్ తివారీ దర్శకత్వంలో రూపొందుతున్న ప్రతిష్ఠాత్మక చిత్రం ‘రామాయణం’ అధికారిక ట్రైలర్ విడుదలైంది. విడుదలైన కొద్ది గంటల్లోనే ట్రైలర్‌కు భారీ స్పందన లభించగా, సోషల్ మీడియా వేదికలపై #Ramayana ట్రెండ్ అవుతోంది.

ట్రైలర్‌లో శ్రీరాముడి పాత్రలో రణబీర్ కపూర్, సీతగా సాయి పల్లవి, రావణుడిగా యశ్ కనిపించిన తీరు ప్రేక్షకులను ఆకట్టుకుంది. ముఖ్యంగా అత్యాధునిక విజువల్ ఎఫెక్ట్స్, భారీ స్థాయి నిర్మాణ విలువలు, భావోద్వేగాలకు ప్రాధాన్యమిచ్చిన కథన శైలి సినిమాపై అంచనాలను మరింత పెంచాయి.

ట్రైలర్ విడుదల అనంతరం నెటిజన్లు గతంలో వచ్చిన ‘ఆదిపురుష్’ చిత్రంతో పోల్చుతూ ఈ చిత్ర విజువల్స్, పాత్రల రూపకల్పన, నాణ్యతపై ప్రశంసలు కురిపిస్తున్నారు. ముఖ్యంగా యశ్ పోషించిన రావణుడి పాత్ర ట్రైలర్‌లో ప్రత్యేక ఆకర్షణగా నిలిచిందని అభిమానులు అభిప్రాయపడుతున్నారు.

ట్రైలర్‌కు అత్యధికంగా ప్రశంసలు లభించినప్పటికీ, సోషల్ మీడియాలో మరో అంశం కూడా చర్చనీయాంశమైంది. రామాయణంలో అత్యంత కీలకమైన పాత్ర అయిన హనుమంతుడిని ట్రైలర్‌లో చూపించకపోవడంపై పలువురు అభిమానులు నిరాశ వ్యక్తం చేశారు. “హనుమంతుడి ఫస్ట్ లుక్ కోసం ఎదురుచూశాం”, “ట్రైలర్‌లో ఒక్క షాట్ అయినా ఉండాల్సింది” అంటూ పలువురు సోషల్ మీడియా వేదికగా అభిప్రాయాలు వ్యక్తం చేస్తున్నారు. అయితే, చిత్ర బృందం ఉద్దేశపూర్వకంగానే హనుమంతుడి పాత్రను గోప్యంగా ఉంచి, సినిమాపై ఆసక్తిని మరింత పెంచే ప్రయత్నం చేసి ఉండొచ్చనే అభిప్రాయం కూడా వ్యక్తమవుతోంది.

హాలీవుడ్ స్థాయి సాంకేతిక నైపుణ్యంతో రూపొందుతున్న ఈ చిత్రం భారతీయ ఇతిహాసాన్ని ప్రపంచ ప్రేక్షకులకు కొత్త స్థాయిలో పరిచయం చేస్తుందనే అభిప్రాయం సినీ వర్గాల్లో వ్యక్తమవుతోంది.

ట్రైలర్