లక్నోలో శనివారం ముఖ్యమంత్రి యోగి ఆదిత్యనాథ్, బీజేపీ యూపీ అధ్యక్షుడు పంకజ్ చౌధరి సంయుక్తంగా ప్రచార ప్రణాళికను వెల్లడించారు.
కేంద్రంలో గత 12 ఏళ్లుగా జరిగిన అభివృద్ధి, సంక్షేమ కార్యక్రమాలతో పాటు యూపీలో గత దశాబ్ద కాలంలో ప్రభుత్వం చేపట్టిన కార్యక్రమాలను గ్రామ పంచాయతీ స్థాయి నుంచి అభివృద్ధి బ్లాకులు, తహసీల్లు, జిల్లాల వరకు ప్రజలకు వివరించనున్నారు.
ప్రధాని మోదీ జన్మస్థలమైన గుజరాత్లోని వడ్నగర్ నుంచి కాశీ వరకు 10 యాత్రలు, కాశీ నుంచి వడ్నగర్కు మరో 10 యాత్రలు నిర్వహించనున్నారు.
వడ్నగర్ వైపు వెళ్లే యాత్రల్లో యూపీలోని 10 నదుల నుంచి పవిత్ర జలాలను తీసుకెళ్లనున్నారు. ప్రతి రోజు యాత్ర మార్గంలో నాలుగు ప్రాంతాల్లో చౌపాల్లు, ప్రజలతో ముఖాముఖి కార్యక్రమాలు నిర్వహించనున్నారు.
అన్ని యాత్రలు సెప్టెంబర్ 17న ప్రారంభమై అక్టోబర్ 7న గమ్యస్థానాలకు చేరుకునేలా ప్రణాళిక రూపొందించారు.
గుజరాత్ ముఖ్యమంత్రిగా, అనంతరం ప్రధానమంత్రిగా మోదీ 25 ఏళ్ల పాటు ప్రభుత్వ అధినేతగా కొనసాగుతున్న సందర్భంగా అక్టోబర్ 7న కార్యక్రమాలకు ప్రత్యేక ప్రాధాన్యం ఇవ్వనున్నారు.
ప్రచారంలో కీలకంగా ‘సేవా సేతు’ శిబిరాలు నిర్వహించనున్నారు. సెప్టెంబర్ 29 నుంచి అక్టోబర్ 10 వరకు రాష్ట్రంలోని ప్రతి అభివృద్ధి బ్లాక్, మున్సిపల్ సంస్థలో ఈ శిబిరాలను ఏర్పాటు చేయనున్నారు.
పింఛన్లు, ఆరోగ్య పథకాలు, గృహాలు, మరుగుదొడ్లు, రేషన్ కార్డులు తదితర ప్రభుత్వ పథకాలకు అర్హులైన వారు ఈ శిబిరాల్లో నమోదు చేసుకునే అవకాశం కల్పించనున్నారు.
శిబిరాల్లో నమోదు చేసుకున్న అర్హులైన ప్రజలకు రెండు నుంచి మూడు రోజుల్లోనే అవసరమైన అధికారిక ప్రక్రియను పూర్తి చేసి సంబంధిత ప్రభుత్వ పథకాలతో అనుసంధానం చేయాలని ప్రభుత్వం లక్ష్యంగా పెట్టుకుంది.
సెప్టెంబర్ 17న ప్రధాని మోదీ జన్మదినాన్ని ‘సేవా దివస్’గా నిర్వహించనున్నారు. గ్రామ పంచాయతీలు, మున్సిపల్ సంస్థలు, ఇతర ప్రభుత్వ, సామాజిక సంస్థల్లో ‘ఆశీర్వాద్ కా దియా’ పేరుతో దీపాలను వెలిగించనున్నారు.
ప్రధాని ఆరోగ్యంగా, దీర్ఘాయుష్షుతో ఉండాలని ప్రార్థిస్తూ ఈ కార్యక్రమాలు నిర్వహించనున్నట్లు యోగి ఆదిత్యనాథ్ తెలిపారు.
సంక్షేమ పథకాల నమోదు, ప్రజా సమస్యలపై కార్యక్రమాలు, యాత్రలు, పారిశుద్ధ్య కార్యక్రమాలతో గ్రామస్థాయి నుంచి బీజేపీ–ప్రభుత్వ యంత్రాంగం ప్రజలతో మరింత ప్రత్యక్షంగా మమేకం కావడమే ‘సేవా సంకల్ప్ అభియాన్’ ప్రధాన లక్ష్యంగా కనిపిస్తోంది. వచ్చే ఏడాది జరగనున్న యూపీ అసెంబ్లీ ఎన్నికలకు ముందు ఈ కార్యక్రమం పార్టీకి కీలక రాజకీయ ప్రచార వేదికగా మారనుంది.
