న్యూఢిల్లీ, ఆగస్టు 22 (నవజ్యోతి ప్రతినిధి):

భారత తూర్పు తీరంలో భారీ విషాదం చోటుచేసుకుంది. పనామా జెండాతో ప్రయాణిస్తున్న
‘ఓషన్‌ విన్నర్‌’ అనే కార్గో నౌక సముద్రంలో మునిగిపోయింది. నౌకలో మొత్తం
24 మంది సిబ్బంది ఉన్నట్లు భారత కోస్ట్‌గార్డ్‌
వెల్లడించింది. ప్రమాదం అనంతరం నౌకతో సంబంధాలు తెగిపోవడంతో భారీ స్థాయిలో
గాలింపు, సహాయక చర్యలు చేపట్టారు.

కోస్ట్‌గార్డ్‌ అధికార ప్రతినిధి కమాండెంట్‌ అమిత్‌ ఉనియాల్‌ తెలిపిన వివరాల ప్రకారం
నౌకలో 20 మంది చైనా పౌరులు, ముగ్గురు మయన్మార్‌ పౌరులు, ఒక బంగ్లాదేశ్‌
పౌరుడు ఉన్నారు. నౌక మునిగిన తర్వాత సిబ్బంది పరిస్థితిపై తీవ్ర ఆందోళన
నెలకొంది.

ప్రమాద సమాచారం అందిన వెంటనే భారత కోస్ట్‌గార్డ్‌ రంగంలోకి దిగింది. శ్రీ విజయపురం
(గతంలో పోర్ట్‌ బ్లెయిర్‌) నుంచి
రెండు కోస్ట్‌గార్డ్‌ నౌకలను గాలింపు, రక్షణ చర్యల కోసం పంపించారు.
ఇప్పటికే లైఫ్‌ రాఫ్ట్‌లలో ఉన్న ఇద్దరిని
రక్షించినట్లు అధికారులు తెలిపారు.

మిగిలిన సిబ్బంది కోసం సముద్రంలో గాలింపు చర్యలు కొనసాగుతున్నాయి. ప్రతికూల
సముద్ర పరిస్థితులు, నౌక మునిగిన ప్రాంతం కారణంగా రెస్క్యూ ఆపరేషన్‌ సవాలుగా
మారినట్లు తెలుస్తోంది.

ప్రభుత్వ వర్గాల సమాచారం ప్రకారం ‘ఓషన్‌ విన్నర్‌’ నౌక
ఐరన్‌ ఓర్‌ లోడ్‌తో సింగపూర్‌కు బయలుదేరింది. గురువారం
ఒడిశాలోని పారాదీప్‌ పోర్టు నుంచి బయలుదేరిన నౌక.. పోర్టుకు సుమారు
240 నాటికల్‌ మైళ్ల దూరంలో సముద్రంలో మునిగిపోయినట్లు
అధికారులు తెలిపారు.

నౌక మునిగిపోవడానికి ప్రాథమిక కారణం ఇంకా తెలియరాలేదు.
ప్రమాదానికి దారితీసిన పరిస్థితులపై అధికారులు దర్యాప్తు చేయాల్సి ఉంది.
ప్రస్తుతం కోస్ట్‌గార్డ్‌ ప్రధానంగా సిబ్బంది ప్రాణాలను కాపాడటంపైనే దృష్టి
సారించింది.

పారాదీప్‌ పోర్ట్‌ అథారిటీ డిప్యూటీ కన్జర్వేటర్‌ కెప్టెన్‌ అలేఖ చరణ్‌ సాహూ
నౌకలో ఉన్న సిబ్బంది సురక్షితంగా ఉండాలని ప్రార్థిస్తున్నట్లు తెలిపారు.
సహాయక చర్యలు విజయవంతమై మిగిలిన వారిని కూడా త్వరగా రక్షిస్తామని
ఆశాభావం వ్యక్తం చేశారు.