టోక్యో, ఆగస్టు 14 (నవజ్యోతి ప్రతినిధి): జపాన్‌లోని చిబా ప్రిఫెక్చర్‌ను భారీ వర్షాలు ముంచెత్తాయి. టోక్యోకు సమీపంలోని చిబాలో 24 గంటల్లో కొన్ని ప్రాంతాల్లో 360 మిల్లీమీటర్లకు పైగా వర్షపాతం నమోదైంది. రహదారులు, రైల్వే మార్గాలు నీటమునగడంతో రవాణా వ్యవస్థ తీవ్రంగా దెబ్బతింది. తాజా సమాచారం ప్రకారం 8 మంది మృతి చెందగా.. ఒకరు గల్లంతయ్యారు.

నరిటా విమానాశ్రయంలో వేల మంది చిక్కుకుని..

భారీ వర్షాల కారణంగా రోడ్డు, రైలు సేవలకు అంతరాయం ఏర్పడటంతో టోక్యో నరిటా అంతర్జాతీయ విమానాశ్రయంలో సుమారు 7 వేల మంది ప్రయాణికులు రాత్రంతా చిక్కుకుపోయారు. విమాన సర్వీసులు కొనసాగుతున్నప్పటికీ.. విమానాశ్రయం నుంచి బయటకు వెళ్లే రవాణా మార్గాలు తీవ్రంగా ప్రభావితమయ్యాయి. ప్రయాణికులకు విమానాశ్రయ సిబ్బంది దుప్పట్లు, నీరు, ఆహారాన్ని అందించారు.

గంటలోనే 100 మిల్లీమీటర్లకు పైగా..

చిబా నగరంలో గంట వ్యవధిలోనే 115 మిల్లీమీటర్ల వర్షం కురిసినట్లు సమాచారం. కొన్ని ప్రాంతాల్లో వరద నీరు రోడ్లను పూర్తిగా కప్పేయడంతో వాహనాలు నీటిలో చిక్కుకున్నాయి. ఇళ్లలోకి కూడా వరద నీరు చేరింది. విద్యుత్‌ సరఫరాకు అంతరాయం ఏర్పడటంతో వేలాది ఇళ్లు అంధకారంలోకి వెళ్లాయి.

సహాయక చర్యల్లో సైన్యం

వరద ప్రభావిత ప్రాంతాల్లో సహాయక చర్యలను ముమ్మరం చేశారు. జపాన్‌ సైనికులను కూడా రంగంలోకి దించి సహాయక, పునరావాస చర్యల్లో భాగస్వాములను చేశారు. అత్యవసర పరిస్థితుల్లో ప్రజలను సురక్షిత ప్రాంతాలకు తరలించేందుకు అధికారులు చర్యలు చేపట్టారు.

రవాణా వ్యవస్థ అతలాకుతలం

రైల్వే ట్రాక్‌లు, రహదారులు నీటమునగడంతో పలు రైలు సర్వీసులు నిలిచిపోయాయి. కొన్నిచోట్ల సేవలను క్రమంగా పునరుద్ధరిస్తున్నప్పటికీ.. వరద నీరు, దెబ్బతిన్న రహదారుల కారణంగా ప్రయాణికులు తీవ్ర ఇబ్బందులు ఎదుర్కొంటున్నారు. చిబా, టోక్యో పరిసరాల్లో అత్యంత రద్దీగా ఉండే సెలవుల వారంలో ఈ విపత్తు చోటుచేసుకోవడం పరిస్థితిని మరింత క్లిష్టంగా మార్చింది.

మృతుల సంఖ్య 8కి పెరుగుదల

తొలుత నాలుగు మంది మృతి చెందినట్లు సమాచారం వెలువడినప్పటికీ.. తాజా సమాచారంలో మృతుల సంఖ్య 8కి చేరింది. మరో వ్యక్తి గల్లంతైనట్లు అధికారులు తెలిపారు. వరద ప్రభావిత ప్రాంతాల్లో సహాయక చర్యలు కొనసాగుతున్నాయి.