17 ఏళ్ల బాలికను ఏడాదిపాటు కుటుంబానికి దూరంగా ఉంచిన యువకుడు అరెస్ట్
పుణె, ఆగస్టు 14 (నవజ్యోతి ప్రతినిధి):
పంజాబ్కు చెందిన 17 ఏళ్ల బాలికను పెళ్లి చేసుకుంటానని నమ్మించి పుణెకు తీసుకొచ్చి.. మతం మార్చుకోవాలని ఒత్తిడి చేసినట్లు ఆరోపణలు ఎదుర్కొంటున్న 21 ఏళ్ల యువకుడిని ఫుర్సుంగి పోలీసులు అరెస్ట్ చేశారు. నిందితుడిని ఉత్తరప్రదేశ్కు చెందిన మొహమ్మద్ రయీస్ రఫీక్ షేక్గా గుర్తించారు. అతడిపై మహారాష్ట్ర ఫ్రీడమ్ ఆఫ్ రిలిజియన్ యాక్ట్–2026 కింద కేసు నమోదు చేశారు.
పోలీసుల వివరాల ప్రకారం.. లూధియానాలో నివసిస్తున్న బాలిక 2025 ఆగస్టు 14న పాఠశాలకు వెళ్తున్నానని చెప్పి ఇంటి నుంచి వెళ్లి తిరిగి రాలేదు. దీంతో తండ్రి పోలీసులకు ఫిర్యాదు చేశారు. కుటుంబ సభ్యులు దాదాపు ఏడాది పాటు ఆమె కోసం గాలించారు.
ఈ ఏడాది జూలై 30న బాలిక తన తల్లికి ఫోన్ చేసి తాను పుణెలోని హండేవాడి రోడ్డులో ఉన్నట్లు చెప్పింది. దీంతో కుటుంబ సభ్యులు వెంటనే పోలీసులను ఆశ్రయించారు.
దర్యాప్తులో షేక్ బాలికను పంజాబ్ నుంచి అలీగఢ్, అనంతరం కర్ణాటకలోని కోలార్ మీదుగా పుణెకు తీసుకొచ్చినట్లు పోలీసులు గుర్తించారు. హండేవాడిలో సుమారు రెండు నెలలుగా ఇద్దరూ కలిసి ఉంటున్నట్లు వెల్లడైంది.
పెళ్లి చేసుకోవాలంటే మతం మార్చుకోవాలని యువకుడు తనపై ఒత్తిడి చేసినట్లు బాలిక పోలీసులకు తెలిపినట్లు అధికారులు వెల్లడించారు. బాలిక వాంగ్మూలం ఆధారంగా పోలీసులు కేసు నమోదు చేసి నిందితుడిని అరెస్ట్ చేశారు.
బాలికను వైద్య పరీక్షలకు తరలించిన అనంతరం జువైనల్ జస్టిస్ బోర్డు ఆదేశాలతో అబ్జర్వేషన్ హోమ్కు తరలించారు. కేసులో తదుపరి న్యాయపరమైన చర్యలు కొనసాగుతున్నాయని పోలీసులు తెలిపారు.
బాలికను సురక్షితంగా గుర్తించిన పోలీసులు.. నిందితుడిని అదుపులోకి తీసుకుని దర్యాప్తు కొనసాగిస్తున్నారు.
