ఆగస్టు 5 నుంచి 12 వరకు ఆన్లైన్ దరఖాస్తుల స్వీకరణ…
హైదరాబాద్, ఆగస్టు 4 (నవజ్యోతి ప్రతినిధి):
తెలంగాణలోని ప్రభుత్వ, ప్రైవేట్ మెడికల్, డెంటల్ కళాశాలల్లో 2026–27 విద్యా సంవత్సరానికి ఎంబీబీఎస్ (MBBS), బీడీఎస్ (BDS) కోర్సుల్లో కాంపిటెంట్ అథారిటీ (కన్వీనర్) కోటా సీట్ల భర్తీకి కాళోజీ నారాయణరావు హెల్త్ యూనివర్సిటీ నోటిఫికేషన్ విడుదల చేసింది. NEET UG–2026లో అర్హత సాధించిన విద్యార్థులు ఆగస్టు 5 ఉదయం 6 గంటల నుంచి ఆగస్టు 12 సాయంత్రం 6 గంటల వరకు tsmedadm.tsche.in వెబ్సైట్లో ఆన్లైన్ ద్వారా దరఖాస్తు చేసుకోవాలని సూచించింది.
వెబ్ ఆప్షన్లకు ముందు సీట్ల మ్యాట్రిక్స్ను ప్రత్యేకంగా ప్రకటిస్తామని యూనివర్సిటీ తెలిపింది. దరఖాస్తు చేసుకునే ముందు ప్రాస్పెక్టస్ను పూర్తిగా చదివి అర్హతలు, రిజర్వేషన్లు, అవసరమైన ధ్రువపత్రాలు, నిబంధనలను పరిశీలించాలని సూచించింది. పూర్తి వివరాలను knruhs.telangana.gov.in వెబ్సైట్లో తెలుసుకోవచ్చని పేర్కొంది.
విద్యార్థులకు ముఖ్య సూచనలు
- ఆన్లైన్ దరఖాస్తుతో పాటు అవసరమైన అన్ని ధ్రువపత్రాలను తప్పనిసరిగా అప్లోడ్ చేయాలి.
- నమోదు ప్రక్రియ ఒక్కసారి మాత్రమే ఉంటుంది. ప్రతి కౌన్సెలింగ్ రౌండ్కు మళ్లీ సర్టిఫికెట్లు అప్లోడ్ చేయాల్సిన అవసరం లేదు.
- ధ్రువపత్రాల పరిశీలన అనంతరం తాత్కాలిక మెరిట్ జాబితాను విడుదల చేస్తారు.
- వెబ్ ఆప్షన్లు, కౌన్సెలింగ్ షెడ్యూల్, సీట్ల మ్యాట్రిక్స్ను అనంతరం యూనివర్సిటీ వెబ్సైట్లో ప్రకటిస్తారు.
- వెబ్ ఆప్షన్లు నమోదు సమయంలో కళాశాలల ప్రాధాన్యత క్రమాన్ని జాగ్రత్తగా ఎంపిక చేసుకోవాలని యూనివర్సిటీ సూచించింది.
