కొండా సురేఖను మంత్రివర్గం నుంచి తప్పించిన రోజే తెలంగాణ ప్రభుత్వం కీలక పదవుల్లో మార్పులు చేయడం రాజకీయంగా ఆసక్తికరంగా మారింది. సురేఖ బర్తరఫ్ జరిగిన సమయంలోనే బీసీ మహిళా నాయకురాలు గద్వాల్ విజయలక్ష్మికి కేబినెట్ మంత్రి హోదాతో ప్రణాళికా బోర్డు వైస్ చైర్పర్సన్ పదవి ఇవ్వడం చర్చనీయాంశంగా మారింది. అదే సమయంలో మహిళా కమిషన్, కుడా చైర్పర్సన్ పదవులకు కూడా కొత్త నియామకాలు చేపట్టింది.
*గద్వాల్ విజయలక్ష్మికి కేబినెట్ హోదా*
తెలంగాణ రాష్ట్ర మహిళా కమిషన్ మాజీ చైర్పర్సన్ గద్వాల్ విజయలక్ష్మిని తెలంగాణ రాష్ట్ర ప్రణాళికా బోర్డు వైస్ చైర్పర్సన్గా ప్రభుత్వం నియమించింది. ఈ పదవిని ఆమె కేబినెట్ మంత్రి హోదాలో నిర్వహించనున్నారు. నియామకం తక్షణమే అమల్లోకి వస్తుందని ప్రభుత్వం ఉత్తర్వుల్లో పేర్కొంది. ఈ మేరకు జీఓ ఆర్టీ నెం.1289 జారీ అయింది.
*చిన్నారెడ్డి స్థానంలో విజయలక్ష్మి*
ప్రణాళికా బోర్డు వైస్ చైర్మన్గా ఉన్న డాక్టర్ జి. చిన్నారెడ్డి నియామకాన్ని ప్రభుత్వం రద్దు చేసింది. ఆయన స్థానంలో గద్వాల్ విజయలక్ష్మిని నియమించింది. సురేఖ బర్తరఫ్ జరిగిన రోజే ఈ మార్పు చోటుచేసుకోవడం ప్రాధాన్యం సంతరించుకుంది.
*మహిళా కమిషన్కు నేరెళ్ల శారద*
గద్వాల్ విజయలక్ష్మి రాజీనామాను ప్రభుత్వం ఆమోదించిన అనంతరం నేరెళ్ల శారదను తెలంగాణ రాష్ట్ర మహిళా కమిషన్ చైర్పర్సన్గా నియమించింది. ఈ నియామకం కూడా తక్షణమే అమల్లోకి వస్తుందని ఉత్తర్వుల్లో పేర్కొంది. ఈ మేరకు జీఓ ఆర్టీ నెం.1290 జారీ అయింది.
*కుడా పగ్గాలు సుధారాణికి*
మాజీ రాజ్యసభ సభ్యురాలు జి. సుధారాణిని కాకతీయ అర్బన్ డెవలప్మెంట్ అథారిటీ (కుడా) చైర్పర్సన్గా ప్రభుత్వం నియమించింది. ఆమె రెండేళ్ల పాటు ఈ పదవిలో కొనసాగనున్నారు. ఈ మేరకు జీఓ ఆర్టీ నెం.1291 జారీ అయింది.
*బర్తరఫ్ రోజే కీలక మార్పులు.. రాజకీయంగా ఆసక్తి*
కొండా సురేఖను మంత్రివర్గం నుంచి తప్పించిన రోజే చిన్నారెడ్డి స్థానంలో గద్వాల్ విజయలక్ష్మి, మహిళా కమిషన్కు నేరెళ్ల శారద, కుడాకు సుధారాణి నియామకాలు జరగడం రాజకీయంగా ఆసక్తిని పెంచింది. ముఖ్యంగా బీసీ మహిళా నాయకురాలైన గద్వాల్ విజయలక్ష్మికి కేబినెట్ హోదాతో కీలక పదవి దక్కడం ప్రాధాన్యం సంతరించుకుంది.
*బీసీ సమీకరణాలకు ప్రాధాన్యమా?*
ఒకవైపు కొండా సురేఖ బర్తరఫ్.. మరోవైపు బీసీ మహిళా నాయకురాలైన గద్వాల్ విజయలక్ష్మికి కేబినెట్ హోదాతో కీలక పదవి. అదే సమయంలో మహిళా కమిషన్, కుడా వంటి ముఖ్యమైన సంస్థలకు కొత్త చైర్పర్సన్లను నియమించడం రాజకీయ వర్గాల్లో చర్చకు దారితీస్తోంది.
సురేఖ బర్తరఫ్ జరిగిన రోజే ఈ నియామకాలు రావడం వల్ల కొత్త సామాజిక, రాజకీయ సమీకరణాలకు సంకేతాలా? అనే చర్చ మొదలైంది.
🔵 *ఒకేరోజు.. మూడు కీలక నియామకాలు*
గద్వాల్ విజయలక్ష్మి – ప్రణాళికా బోర్డు వైస్ చైర్పర్సన్
కేబినెట్ మంత్రి హోదా
నేరెళ్ల శారద – తెలంగాణ రాష్ట్ర మహిళా కమిషన్ చైర్పర్సన్
జి. సుధారాణి – కుడా చైర్పర్సన్
కొండా సురేఖ బర్తరఫ్ జరిగిన రోజే వెలువడిన ఈ నియామకాలు తెలంగాణ రాజకీయాల్లో ఆసక్తిని పెంచాయి.
