యూరప్‌ కార్లకు భారత్‌లో భారీ రాయితీ!

లక్ష కార్లతో మొదలు.. 1.6 లక్షలకు పెంపు

యూరోపియన్‌ యూనియన్‌ నుంచి దిగుమతి చేసే అంతర్గత దహన ఇంజిన్‌ కార్లు, హైబ్రిడ్‌ కార్లకు ఈ సుంక రాయితీ వర్తిస్తుంది. మొదటి ఏడాదిలో కోటా 1,00,000 కార్లుగా ఉంటుంది. రెండో ఏడాది 1,07,500, మూడో ఏడాది 1,15,000, నాలుగో ఏడాది 1,22,500 కార్లకు పెరుగుతుంది.

ఐదో ఏడాదికి 1.3 లక్షలకు చేరుకుని.. ఆ తర్వాత క్రమంగా పెరుగుతూ పదో ఏడాది నుంచి 1.6 లక్షల కార్లకు చేరుతుంది.

రూ.16.6 లక్షలకుపైగా కార్లకే రాయితీ

అన్ని కార్లకూ ఈ ప్రయోజనం లభించదు. 15,000 యూరోలు (సుమారు రూ.16.6 లక్షలు) కంటే ఎక్కువ ధర ఉన్న కార్లకే రాయితీ వర్తిస్తుంది. అంతకంటే తక్కువ ధర ఉన్న కార్లకు ఈ సౌకర్యం ఉండదు.

15,000–35,000 యూరోల మధ్య ధర ఉన్న కార్లపై మొదటి ఏడాది సుంకం 110 శాతం నుంచి 35 శాతానికి తగ్గి.. ఐదో ఏడాదికి 10 శాతానికి చేరుతుంది. 35,000 యూరోలకుపైగా ధర ఉన్న కార్లపై సుంకం మొదటి ఏడాదిలో 30 శాతానికి, ఐదో ఏడాదికి 10 శాతానికి తగ్గేలా ప్రతిపాదించారు.

లగ్జరీ కార్లకు ప్రత్యేక కోటా

ఖరీదైన కార్లకు కూడా ప్రత్యేక పరిమితి ఉంటుంది. 50,000 యూరోలు (సుమారు రూ.55.4 లక్షలు) కంటే ఎక్కువ ధర ఉన్న కార్లకు ఐదో ఏడాది నుంచి 43,000 కార్ల వరకు కోటా కేటాయించనున్నారు.

కోటా పరిమితిని మించిన కార్లపై కూడా సుంకం క్రమంగా తగ్గుతుంది. 50,000 యూరోలకుపైగా ఉన్న కార్లకు పదో ఏడాదికి సుంకం 30 శాతానికి చేరేలా ప్రతిపాదించారు.

ఎలక్ట్రిక్‌ కార్లకూ రాయితీలు

బ్యాటరీ ఆధారిత విద్యుత్‌ కార్లు, ప్లగ్‌–ఇన్‌ హైబ్రిడ్‌ కార్లు, ఇతర అర్హత కలిగిన సాంకేతికతల వాహనాలకు ఐదో ఏడాది నుంచి రాయితీలు ప్రారంభమవుతాయి. అయితే 20,000 యూరోలు (సుమారు రూ.22 లక్షలు) లేదా అంతకంటే ఎక్కువ ధర ఉన్న వాహనాలకే ఈ ప్రయోజనం వర్తిస్తుంది.

వీటి కోటా ఐదో ఏడాదిలో 20,000 కార్లతో ప్రారంభమై.. పదో ఏడాదికి 50,000కు, 14వ ఏడాది నుంచి 90,000 కార్లకు చేరనుంది. కోటాలో సుంకం ఐదో ఏడాదిలో 30 శాతం నుంచి పదో ఏడాదికి 10 శాతానికి తగ్గనుంది.

వైన్‌పై కూడా భారీ రాయితీ

యూరోపియన్‌ యూనియన్‌ నుంచి దిగుమతి చేసే వైన్‌పై కూడా భారత్‌ సుంక రాయితీలు కల్పించనుంది. అయితే వైన్‌ ధరను బట్టి సుంకం మారుతుంది. 2.50 యూరోల కంటే తక్కువ విలువ ఉన్న వైన్‌కు రాయితీ ఉండదు.. ప్రస్తుత 150 శాతం ప్రాథమిక సుంకమే కొనసాగుతుంది.

2.50–10 యూరోల మధ్య విలువ ఉన్న వైన్‌పై సుంకం మొదటి ఏడాదిలో 75 శాతానికి తగ్గి.. ఎనిమిదో ఏడాది నుంచి 30 శాతానికి చేరుతుంది. 10 యూరోలు లేదా అంతకంటే ఎక్కువ విలువ ఉన్న వైన్‌పై సుంకం ఎనిమిదో ఏడాది నుంచి 20 శాతానికి తగ్గుతుంది.

యాపిల్‌, కివీ, పియర్‌, పీచ్‌లకూ కోటా

యూరోపియన్‌ వ్యవసాయ ఉత్పత్తులకూ భారత్‌ పరిమిత కోటాతో సుంక రాయితీలు ఇవ్వనుంది.

• పంది మాంసం: ఏటా 2,000 మెట్రిక్‌ టన్నులకు రాయితీ.
• యాపిల్‌: కిలోకు కనీసం రూ.80 ధర ఉన్న వాటికి మొదటి ఏడాది 50,000 టన్నుల కోటా. పదకొండో ఏడాది నుంచి లక్ష టన్నులకు పెంపు.
• కివీ: మొదటి ఏడాది 12,000 టన్నులు.. పదకొండో ఏడాది నుంచి 15,000 టన్నులు.
• పియర్‌: ఏటా 2,250 టన్నుల స్థిర కోటా.
• పీచ్‌: ఏటా కేవలం 20 టన్నుల కోటా.

భారత్‌ నుంచి యూరప్‌కు కొత్త అవకాశాలా?

భారత్‌–ఈయూ ఒప్పందంతో ఇరువైపులా మార్కెట్‌ ప్రాప్తి పెరగనుంది. అయితే ఆటోమొబైల్‌, వైన్‌, కొన్ని వ్యవసాయ ఉత్పత్తుల విషయంలో భారత్‌ పూర్తిస్థాయి సుంకాల తొలగింపుకంటే పరిమిత కోటాలు, ధర ఆధారిత రాయితీలను ఎంచుకున్నట్లు ముసాయిదా సూచిస్తోంది.

నిర్దేశించిన ధర, పరిమాణం, మూల దేశ నిబంధనలకు అనుగుణంగా ఉన్న దిగుమతులకే తక్కువ సుంకం వర్తిస్తుంది. కోటా దాటిన దిగుమతులకు సాధారణ సుంకాలు కొనసాగుతాయి.

ఇప్పటి దిగుమతులతో పోలిస్తే భారీ కోటా

వాణిజ్య పరిశోధనా సంస్థ జీటీఆర్‌ఐ వ్యవస్థాపకుడు అజయ్‌ శ్రీవాస్తవ అభిప్రాయం ప్రకారం, 2025లో భారత్‌ ఈయూ నుంచి కేవలం 17,191 కార్లను దిగుమతి చేసుకుంది. దీనితో పోలిస్తే మొదటి ఏడాదిలోనే లక్ష కార్లకు రాయితీ కోటా కల్పించడం గణనీయమైన పెంపు.

బ్రిటన్‌ తర్వాత ఆటోమొబైల్‌ రంగంలో ఇలాంటి సుంక రాయితీలను పొందిన మరో ప్రధాన వాణిజ్య భాగస్వామిగా ఈయూ నిలుస్తోందని జీటీఆర్‌ఐ పేర్కొంది. భవిష్యత్తులో జపాన్‌, దక్షిణ కొరియా వంటి దేశాల నుంచి కూడా ఇలాంటి డిమాండ్లు రావచ్చని ఆయన అభిప్రాయపడ్డారు.

ఈ ఏడాది చివరికి ఒప్పందం?

భారత్‌–యూరోపియన్‌ యూనియన్‌ స్వేచ్ఛా వాణిజ్య ఒప్పందం ఈ ఏడాది చివరికి సంతకం అయ్యే అవకాశం ఉందని, వచ్చే ఏడాది నుంచి అమల్లోకి వచ్చే అవకాశం ఉందని ముసాయిదా వివరాల ఆధారంగా సమాచారం. అయితే తుది నిబంధనలు, అమలు తేదీపై అధికారిక ప్రక్రియ పూర్తయ్యే వరకు మార్పులు ఉండే అవకాశం ఉంది.