చక్కెర నిల్వలపై కేంద్రం కొరడా!

న్యూఢిల్లీ, సెప్టెంబర్‌ 1 (నవజ్యోతి ప్రతినిధి):
చక్కెర ధరలను అదుపులోకి తీసుకురావడం, అక్రమ నిల్వలు–ఊహాజనిత వ్యాపారాన్ని కట్టడి చేయడమే లక్ష్యంగా కేంద్రం మరోసారి నిబంధనలు కఠినతరం చేసింది. డీలర్లు నిల్వ చేసుకునే చక్కెర పరిమితిని 4,000 క్వింటాళ్ల నుంచి 2,000 క్వింటాళ్లకు తగ్గించింది.

కేంద్ర ఆహార, ప్రజా పంపిణీ శాఖ జారీ చేసిన తాజా నిబంధనలు సెప్టెంబర్‌ 15 నుంచి నవంబర్‌ 30 వరకు అమల్లో ఉంటాయి. చక్కెర ధరలు ఇటీవలి నెలల్లో అధికంగా ఉండటంతో నిల్వలపై కేంద్రం దృష్టి సారించింది.

• డీలర్లు ఒకేసారి 2,000 క్వింటాళ్లకు మించి చక్కెర నిల్వ చేయకూడదు.

• సరుకు అందిన తేదీ నుంచి 30 రోజులకు మించి నిల్వ ఉంచేందుకు అనుమతి లేదు.

• ఈ పరిమితులు దేశవ్యాప్తంగా అమల్లో ఉంటాయి. అయితే కోల్‌కతా, దాని విస్తరించిన మెట్రోపాలిటన్‌ ప్రాంతాలకు మాత్రం 4,000 క్వింటాళ్ల పరిమితి కొనసాగుతుంది.

కోల్‌కతాకు మినహాయింపు ఎందుకు?

కోల్‌కతా తూర్పు, ఈశాన్య రాష్ట్రాలకు కీలక పంపిణీ కేంద్రంగా పనిచేస్తోందని కేంద్రం పేర్కొంది. ఉత్తరప్రదేశ్‌, మహారాష్ట్రల నుంచి చక్కెరను సమీకరించి తూర్పు, ఈశాన్య ప్రాంతాలకు సరఫరా చేసే ప్రధాన హబ్‌ కావడంతో అక్కడ పాత 4,000 క్వింటాళ్ల పరిమితినే కొనసాగించింది.

తక్కువ ఉత్పత్తి: వర్షపాతం లోపం, అధిక వర్షాలు వంటి ప్రతికూల వాతావరణ పరిస్థితులు చెరకు దిగుబడులను ప్రభావితం చేశాయి. మహారాష్ట్ర, కర్ణాటక వంటి ప్రధాన ఉత్పత్తి రాష్ట్రాల్లో ఉత్పత్తిలో హెచ్చుతగ్గులు నమోదయ్యాయి.

ఇథనాల్‌ ఉత్పత్తి: ఇథనాల్‌ బ్లెండింగ్‌ కార్యక్రమం కారణంగా చెరకు, షుగర్‌ సిరప్‌కు డిమాండ్‌ పెరిగింది. దీంతో ఆహార మార్కెట్‌కు వచ్చే చక్కెరలో కొంత భాగం ఇథనాల్‌ తయారీకి మళ్లుతోంది.

ఉత్పత్తి వ్యయాల పెరుగుదల: చెరకు సాగు, కూలీలు, రవాణా, ప్రాసెసింగ్‌ ఖర్చులు పెరగడం కూడా చక్కెర ధరలపై ప్రభావం చూపుతోంది.

నిల్వలు: భవిష్యత్తులో సరఫరా తగ్గుతుందన్న అంచనాలతో కొందరు వ్యాపారులు ఎక్కువగా నిల్వ చేయడం మార్కెట్‌లో తాత్కాలిక కొరతను సృష్టించే అవకాశం ఉంది.

పండుగల డిమాండ్‌: పండుగల సీజన్‌ సమీపిస్తుండటంతో ఇళ్లు, స్వీట్ల తయారీదారులు, ఆహార పరిశ్రమల నుంచి చక్కెరకు డిమాండ్‌ పెరుగుతోంది.

ధరలు తగ్గించడమే లక్ష్యం

అధిక నిల్వలతో మార్కెట్‌లో కృత్రిమ కొరత ఏర్పడకుండా చూడటం, ఊహాజనిత వ్యాపారాన్ని అడ్డుకోవడం ద్వారా చక్కెర ధరలపై ఒత్తిడిని తగ్గించాలన్నది కేంద్రం తాజా చర్య ఉద్దేశంగా కనిపిస్తోంది. నవంబర్‌ 30 వరకు ఈ పరిమితులు అమల్లో ఉండనున్నాయి.

చక్కెర ధరలపై కేంద్రం వరుస చర్యలు.. డీలర్ల నిల్వ పరిమితి సగానికి కుదింపు.. 30 రోజుల గరిష్ఠ నిల్వ గడువు. పండుగల సీజన్‌లో ధరలు అదుపులో ఉండేలా మార్కెట్‌పై కేంద్రం నిఘా మరింత కఠినం కానుంది.