స్కానింగ్ కోసం కళ్లను చేతితో తెరిచి ఉంచిన పలువురు.. సోషల్ మీడియాలో ఆసక్తికర చర్చ
నాగాలాండ్, ఆగస్టు 14 (నవజ్యోతి ప్రతినిధి):
కేవైసీ కోసం ఉపయోగించే బయోమెట్రిక్ యాప్ ఓ వ్యక్తి కళ్లను పదేపదే గుర్తించకపోవడంతో అతడికి ఎదురైన ఇబ్బందికి సంబంధించిన వీడియో సోషల్ మీడియాలో వైరల్గా మారింది. నాగాలాండ్కు చెందిన ఓ వ్యక్తి బయోమెట్రిక్ స్కానింగ్ చేయించుకునేందుకు ప్రయత్నించగా.. యాప్ అతడి కళ్లను గుర్తించలేదు.
స్కానింగ్ పూర్తయ్యేలా పలువురు అతడి కళ్లను తెరిచి ఉంచేందుకు ప్రయత్నించడం వీడియోలో కనిపించింది. ఎన్నిసార్లు ప్రయత్నించినా యాప్ స్పందించకపోవడంతో అక్కడున్న వారు వివిధ రకాలుగా ప్రయత్నించిన దృశ్యాలు నవ్వులు పూయిస్తున్నాయి.
నాగాలాండ్ మంత్రి తేమ్జెన్ ఇమ్నా అలోంగ్ ఈ వీడియోను ఎక్స్లో షేర్ చేయడంతో నెటిజన్ల దృష్టిని ఆకర్షించింది. వీడియోపై పలువురు సరదాగా స్పందిస్తుండగా.. మరికొందరు బయోమెట్రిక్ వ్యవస్థల్లో ఎదురయ్యే సాంకేతిక సమస్యలపై చర్చిస్తున్నారు.
వివిధ ప్రాంతాలు, వర్గాలకు చెందిన ప్రజల బయోమెట్రిక్ డేటాతో పనిచేసే వ్యవస్థల్లో వైవిధ్యాన్ని పరిగణనలోకి తీసుకోవాల్సిన అవసరాన్ని ఈ ఘటన మరోసారి చర్చకు తెచ్చింది. అయితే ఈ ప్రత్యేక యాప్ ఎందుకు విఫలమైందనే దానిపై ఇప్పటివరకు అధికారిక సాంకేతిక వివరణ వెలువడలేదు.
కేవైసీ స్కానింగ్ విఫలం కావడంతో పలువురు కలిసి ప్రయత్నించిన దృశ్యాలు సోషల్ మీడియాలో వైరల్గా మారి.. బయోమెట్రిక్ సాంకేతికత పనితీరుపై ఆసక్తికర చర్చకు దారితీశాయి.
