తప్పుదారిలో దూసుకొచ్చిన ఎస్యూవీ.. ముగ్గురికి గాయాలు, ఒకరి పరిస్థితి విషమం…
హైదరాబాద్, ఆగస్టు 10 (నవజ్యోతి ప్రతినిధి): హైదర్షాకోట్లో వేగంగా, తప్పుదారిలో దూసుకొచ్చిన మహీంద్రా ఎక్స్యూవీ బీభత్సం సృష్టించింది. ఈ ప్రమాదంలో ఆర్మీ జవాన్ మృతి చెందగా.. మరో ముగ్గురు గాయపడ్డారు. వారిలో ఒకరి పరిస్థితి విషమంగా ఉన్నట్లు సమాచారం. ఈ ఘటన నార్సింగి పోలీస్స్టేషన్ పరిధిలో చోటుచేసుకుంది.
ప్రాథమిక సమాచారం ప్రకారం.. వేగంగా వచ్చిన ఎక్స్యూవీ తొలుత ఆర్మీ జవాన్ను ఢీకొట్టింది. ఆ తర్వాత కూడా వాహనం ఆగకుండా ముందుకు వెళ్లి పలువురిని ఢీకొట్టినట్లు తెలుస్తోంది. తీవ్ర గాయాలతో ఆర్మీ జవాన్ అక్కడికక్కడే మృతి చెందారు. గాయపడిన ముగ్గురిని సమీపంలోని ఆసుపత్రికి తరలించారు.
ప్రమాద సమయంలో ఎక్స్యూవీలో ఐదుగురు యువకులు ఉన్నట్లు ప్రాథమిక సమాచారం. వారు మద్యం మత్తులో ఉన్నారంటూ స్థానికులు ఆరోపిస్తున్నప్పటికీ.. దీనిని పోలీసులు అధికారికంగా ధ్రువీకరించాల్సి ఉంది. వాహనం షాద్నగర్ ఎయిర్పోర్టు ప్రాంతానికి చెందిన బాబు గౌడ్ పేరుతో ఉన్నట్లు సమాచారం.
ప్రమాదంపై నార్సింగి పోలీసులు కేసు నమోదు చేసి దర్యాప్తు చేస్తున్నారు. వాహనం నడిపింది ఎవరు? ప్రమాదం ఎలా జరిగింది? అనే అంశాలపై కారులో ఉన్న వారిని పోలీసులు విచారిస్తున్నారు. మృతదేహాన్ని పోస్టుమార్టం నిమిత్తం ఉస్మానియా జనరల్ ఆసుపత్రి మార్చురీకి తరలించారు.
గమనిక: మద్యం సేవించినట్లు వచ్చిన ఆరోపణలు ప్రస్తుతం స్థానికుల వాదన మాత్రమే. పోలీసులు అధికారికంగా నిర్ధారించాల్సి ఉంది. అలాగే మృతుడిని కొన్ని నివేదికలు మాజీ సైనికుడిగా, మరికొన్ని ఆర్మీ జవాన్గా పేర్కొన్నాయి. పూర్తి వివరాలు దర్యాప్తులో తేలాల్సి ఉంది.
