ఆరు నెలల్లో పర్యావరణ అనుమతులు పూర్తి చేయాలని ఉత్తమ్ ఆదేశం
సుప్రీంకోర్టు తాజా తీర్పు నేపథ్యంలో తెలంగాణలోని నాలుగు ప్రధాన సాగునీటి ప్రాజెక్టులకు పర్యావరణ అనుమతులు పొందే ప్రక్రియను వేగవంతం చేయాలని రాష్ట్ర సాగునీటి శాఖ మంత్రి ఎన్. ఉత్తమ్ కుమార్ రెడ్డి అధికారులను ఆదేశించారు. పాలమూరు–రంగారెడ్డి ఎత్తిపోతల పథకం, సీతారామ సాగర్, దిండి, గౌరవెల్లి ప్రాజెక్టులకు సంబంధించిన అన్ని అనుమతులను ఆరు నెలల్లో పూర్తి చేసేలా కార్యాచరణ రూపొందించాలని సూచించారు.
ఉన్నతస్థాయి సమీక్ష
సోమవారం నిర్వహించిన ఉన్నతస్థాయి సమీక్ష సమావేశంలో రెవెన్యూ మంత్రి పొంగులేటి శ్రీనివాస్ రెడ్డి, రవాణా మంత్రి పొన్నం ప్రభాకర్, ఎంపీ బలరాం నాయక్తో పాటు ఉన్నతాధికారులు పాల్గొన్నారు. ప్రాజెక్టుల పురోగతి, పెండింగ్లో ఉన్న పర్యావరణ అనుమతులు, న్యాయపరమైన అంశాలపై విస్తృతంగా చర్చించారు.
సుప్రీంకోర్టు తీర్పుతో వేగం
సుప్రీంకోర్టు తాజా తీర్పు ప్రకారం ఇప్పటికే చెల్లుబాటు అయ్యే పర్యావరణ అనుమతులు కొనసాగుతాయని, పెండింగ్లో ఉన్న దరఖాస్తుల పరిశీలన వేగవంతమవుతుందని మంత్రి తెలిపారు. గతంలో తిరస్కరణకు గురైన ప్రతిపాదనలను అవసరమైన లోపాలు సరిదిద్ది మళ్లీ సమర్పించాలని అధికారులకు సూచించారు.
అంతర్రాష్ట్ర వ్యవహారాల విభాగం బలోపేతం
ప్రాజెక్టులకు సంబంధించిన న్యాయ, సాంకేతిక, పర్యావరణ అంశాలను సమర్థంగా ఎదుర్కొనేందుకు అంతర్రాష్ట్ర వ్యవహారాల విభాగాన్ని నిపుణులతో బలోపేతం చేయాలని ఉత్తమ్ కుమార్ రెడ్డి ఆదేశించారు. కేంద్ర ప్రభుత్వంతో సమన్వయం పెంచి అనుమతుల ప్రక్రియను వేగంగా పూర్తి చేయాలని సూచించారు.
గౌరవెల్లి, సీతారామ ప్రాజెక్టులపై ప్రత్యేక దృష్టి
గౌరవెల్లి పంప్హౌస్ను తక్షణమే మరమ్మతులు చేసి అందుబాటులోకి తీసుకురావడంతో పాటు కాలువల పరిస్థితిని పరిశీలించాలని అధికారులను ఆదేశించారు. సీతారామ సాగర్ ప్రాజెక్టుకు అవసరమైన ఇంజినీరింగ్ ప్రణాళికలను ముందుగానే సిద్ధం చేసి పనులు ఆలస్యం కాకుండా చర్యలు తీసుకోవాలని సూచించారు.
పోలవరం బ్యాక్వాటర్ ప్రభావంపై సమీక్ష
పోలవరం ప్రాజెక్టు బ్యాక్వాటర్ ప్రభావంపై కూడా సమావేశంలో చర్చ జరిగింది. ఉమ్మడి ఖమ్మం జిల్లాలో ముంపు ప్రభావాన్ని శాస్త్రీయంగా అంచనా వేసి, భూములు, ఇళ్లు, ఇతర మౌలిక వసతులకు కలిగే నష్టంపై సమగ్ర నివేదిక రూపొందించాలని మంత్రి ఆదేశించారు. కేంద్ర ప్రభుత్వం నుంచి పూర్తి పరిహారం పొందేందుకు అవసరమైన చర్యలను వేగవంతం చేయాలని అధికారులకు సూచించారు.
© నవజ్యోతి తెలుగు డైలీ
