హైదరాబాద్‌, ORR పరిధిలో ట్రాఫిక్‌ నియంత్రణ, రోడ్డు ప్రమాదాల నివారణకు సమగ్ర ప్రణాళిక

AI ఆధారిత ట్రాఫిక్‌ వ్యవస్థపై దృష్టి.. నవంబర్‌, డిసెంబర్‌లో అవసరమైన ప్రాంతాల్లో కొత్త సిగ్నల్స్‌

హైదరాబాద్‌, ఆగస్టు 27 (నవజ్యోతి ప్రతినిధి):

హైదరాబాద్‌ నగరంతో పాటు ఔటర్‌ రింగ్‌ రోడ్డు (ORR) పరిధిలో పెరుగుతున్న ట్రాఫిక్‌ రద్దీ, రోడ్డు ప్రమాదాలను నియంత్రించేందుకు సమగ్ర కార్యాచరణ ప్రణాళిక సిద్ధం చేయాలని ప్రభుత్వ ప్రధాన కార్యదర్శి సంజయ్‌ జాజు అధికారులను ఆదేశించారు. ముఖ్యమంత్రి ఏ. రేవంత్‌రెడ్డి ఆదేశాల మేరకు గురువారం డాక్టర్‌ బీఆర్‌ అంబేద్కర్‌ తెలంగాణ రాష్ట్ర సచివాలయంలో ఉన్నతాధికారులతో నిర్వహించిన సమావేశంలో ట్రాఫిక్‌ నిర్వహణ, రోడ్డు భద్రతపై ఆయన విస్తృతంగా సమీక్షించారు.

ప్రమాదాలు ఎక్కువగా జరిగే ప్రాంతాలను గుర్తించడం, ట్రాఫిక్‌ సిగ్నల్స్‌ నిర్వహణ, రోడ్డు భద్రతా చర్యలు, అత్యవసర సేవల వాహనాలు వేగంగా వెళ్లేందుకు ప్రత్యేక మార్గాల కల్పన తదితర అంశాలపై సమావేశంలో చర్చించారు. నగరాలతో పాటు జిల్లా కేంద్రాలు, మున్సిపాలిటీలు, పట్టణ ప్రాంతాలు, ORR పరిధిలో అవసరమైన చోట్ల ట్రాఫిక్‌ సిగ్నలింగ్‌ వ్యవస్థను బలోపేతం చేయాలని సీఎస్‌ సూచించారు.

నవంబర్‌, డిసెంబర్‌లో కొత్త సిగ్నలింగ్‌ వ్యవస్థలు

అవసరమైన ప్రాంతాల్లో ట్రాఫిక్‌ సిగ్నలింగ్‌ ఏర్పాటు చేసేందుకు డీపీఆర్‌ (వివరమైన ప్రాజెక్టు నివేదిక)ను త్వరగా సిద్ధం చేయాలని అధికారులను ఆదేశించారు. నవంబర్‌, డిసెంబర్‌ నాటికి అవసరమైన ప్రాంతాల్లో సిగ్నలింగ్‌ వ్యవస్థలను ఏర్పాటు చేసేలా చర్యలు తీసుకోవాలని సూచించారు.

పోలీసులు, రవాణా, రోడ్లు-భవనాలు, మున్సిపల్‌ పరిపాలన, పట్టణాభివృద్ధి తదితర శాఖలు సమన్వయంతో పనిచేయాలని సంజయ్‌ జాజు స్పష్టం చేశారు. ట్రాఫిక్‌ నిర్వహణ, రోడ్డు భద్రత ఏ ఒక్క శాఖ బాధ్యత కాదని, అన్ని శాఖలు కలిసి పనిచేసినప్పుడే ప్రమాదాలను సమర్థంగా తగ్గించగలమని పేర్కొన్నారు.

ట్రాఫిక్‌ డేటా కోసం ప్రత్యేక ప్లాట్‌ఫామ్‌

వివిధ ప్రాంతాల నుంచి సేకరించే ట్రాఫిక్‌ సమాచారాన్ని ఒకే వేదికపైకి తీసుకువచ్చి విశ్లేషించేలా ఇంటిగ్రేటెడ్‌ ట్రాఫిక్‌ డేటా ప్లాట్‌ఫామ్‌ ఏర్పాటుకు అవకాశాలను పరిశీలించాలని సీఎస్‌ సూచించారు. ట్రాఫిక్‌ సమస్యల మూలాలను డేటా ఆధారంగా గుర్తించి శాశ్వత పరిష్కారాలు రూపొందించాలని అన్నారు.

నార్కోటిక్స్‌ బ్యూరో, TG-SAFE తరహాలో ట్రాఫిక్‌ నిర్వహణ, రోడ్డు భద్రత కోసం TG-TMARS (Traffic Management and Road Safety) పేరుతో ప్రత్యేక, స్వతంత్ర వ్యవస్థ ఏర్పాటుకు ప్రతిపాదనలు సిద్ధం చేయాలని సూచించారు.

429 ట్రాఫిక్‌ సిగ్నల్స్‌.. మరింత ఆధునికీకరణ

GHMC పరిధిలో ప్రస్తుతం 429 ట్రాఫిక్‌ సిగ్నలింగ్‌ వ్యవస్థలు ఉన్నాయని అధికారులు సీఎస్‌కు వివరించారు. వీటిలో అధునాతన సిగ్నల్‌ కంట్రోల్‌ వ్యవస్థలను వినియోగిస్తున్నట్లు తెలిపారు. ఇప్పటికే ఉన్న వ్యవస్థలను మరింత ఆధునికీకరించడంతో పాటు అవసరమైన ప్రాంతాల్లో కొత్త సిగ్నల్స్‌ ఏర్పాటు చేయాలని సంజయ్‌ జాజు ఆదేశించారు.

ఎలక్ట్రానిక్‌ ఎన్‌ఫోర్స్‌మెంట్‌ను బలోపేతం చేయాలని, సుప్రీంకోర్టు మార్గదర్శకాలకు అనుగుణంగా రోడ్డు భద్రతా చర్యలు అమలు చేయాలని సూచించారు. ఫుట్‌పాత్‌లపై ఆక్రమణలను కఠినంగా అరికట్టాలని అధికారులను ఆదేశించారు.

AIతో ట్రాఫిక్‌ సమస్యలకు పరిష్కారం

ట్రాఫిక్‌ నిర్వహణను మరింత సమర్థంగా, రోడ్డు ప్రయాణాన్ని సురక్షితంగా మార్చేందుకు కృత్రిమ మేధ (AI) ఆధారిత సాంకేతిక పరిజ్ఞానాన్ని విస్తృతంగా వినియోగించేలా సమగ్ర ప్రణాళిక రూపొందించాలని సీఎస్‌ ఆదేశించారు.

సాంకేతికతను కేవలం ట్రాఫిక్‌ ఉల్లంఘనలను గుర్తించేందుకే పరిమితం చేయకుండా.. ప్రజలకు సురక్షితమైన, వేగవంతమైన, సౌకర్యవంతమైన ప్రయాణం అందించడమే లక్ష్యంగా వినియోగించాలని సూచించారు. ట్రాఫిక్‌ సమస్యలకు తాత్కాలిక చర్యలకంటే శాశ్వత పరిష్కారాలను గుర్తించేలా డేటా ఆధారిత, సాంకేతికతతో కూడిన ప్రజాకేంద్రిత విధానాలను అవలంబించాలని అన్నారు.

ముందుగా పైలట్‌ ప్రాజెక్టులు

ట్రాఫిక్‌ నిర్వహణ, రోడ్డు భద్రతకు అందుబాటులో ఉన్న తాజా AI సాంకేతికతలను అధ్యయనం చేసి, రాష్ట్రంలోని అనువైన ప్రాంతాల్లో ముందుగా పైలట్‌ ప్రాజెక్టులు చేపట్టాలని సమావేశంలో నిర్ణయించారు. వాటి ఫలితాలను పరిశీలించిన అనంతరం దశలవారీగా రాష్ట్రవ్యాప్తంగా విస్తరించాలని సీఎస్‌ సూచించారు.

అత్యవసర సేవల వాహనాలకు వేగంగా మార్గం కల్పించడం, ప్రమాదాలకు గురయ్యే ప్రాంతాల్లో ముందస్తు చర్యలు చేపట్టడం, ట్రాఫిక్‌ సిగ్నల్స్‌ను సమర్థంగా నిర్వహించడం వంటి అంశాలకు ప్రాధాన్యం ఇవ్వనున్నారు. నగరంతో పాటు రాష్ట్రంలోని ఇతర పట్టణాలు, జిల్లా కేంద్రాల్లోనూ రోడ్డు భద్రతా చర్యలను బలోపేతం చేయాలని నిర్ణయించారు.

సమావేశంలో పాల్గొన్న అధికారులు

సమావేశంలో డీజీపీ సీవీ ఆనంద్, రవాణా, రోడ్లు-భవనాల శాఖ ప్రత్యేక ప్రధాన కార్యదర్శి వికాస్‌రాజ్, రవాణా కమిషనర్‌ ఇలంబర్తి, మల్కాజిగిరి మున్సిపల్‌ కమిషనర్‌ వినయ్‌కృష్ణారెడ్డి, హైదరాబాద్‌ నగర పోలీస్‌ కమిషనర్‌ వీసీ సజ్జనార్తో పాటు పలువురు ఉన్నతాధికారులు పాల్గొన్నారు.