హైదరాబాద్‌, ఆగస్టు 24 (నవజ్యోతి ప్రతినిధి):
కాంగ్రెస్‌ ప్రభుత్వం వెయ్యి రోజుల పాలన పూర్తి చేసుకుంటున్న నేపథ్యంలో
బీఆర్‌ఎస్‌ రాష్ట్రవ్యాప్తంగా భారీ రాజకీయ ప్రచారానికి సిద్ధమవుతోంది.
సెప్టెంబర్‌ 2 నుంచి వారం రోజుల పాటు
‘వెయ్యి రోజుల వైఫల్యాలు’ పేరుతో కార్యక్రమాలు నిర్వహించాలని
బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ పార్టీ శ్రేణులకు
దిశానిర్దేశం చేశారు.

సీనియర్‌ నాయకులు, ప్రజాప్రతినిధులు, రాష్ట్ర కమిటీ సభ్యులతో నిర్వహించిన
టెలీకాన్ఫరెన్స్‌లో కేటీఆర్‌ ప్రచార కార్యాచరణపై సూచనలు చేశారు.
కాంగ్రెస్‌ ఇచ్చిన హామీలు, వాటి అమలు పరిస్థితితో పాటు రాష్ట్రంలోని
వివిధ వర్గాలు ఎదుర్కొంటున్న సమస్యలను ప్రజల్లోకి తీసుకెళ్లాలని
ఆదేశించారు.

కాంగ్రెస్‌ అధికారంలోకి రావడానికి ముందు 420 హామీలు,
13 డిక్లరేషన్లు, ఆరు గ్యారెంటీలు ప్రకటించి 100 రోజుల్లో
అమలు చేస్తామని చెప్పిందని కేటీఆర్‌ ఆరోపించారు. వెయ్యి రోజుల పాలన
పూర్తవుతున్నా ఒక్క హామీని కూడా పూర్తిస్థాయిలో అమలు చేయలేదని ఆయన
విమర్శించారు.

ఎన్నికలకు ముందు ఇచ్చిన హామీలు, అధికారంలోకి వచ్చిన తర్వాత వాటి అమలు
పరిస్థితికి మధ్య ఉన్న వ్యత్యాసాన్ని ప్రజలకు వివరించాలని పార్టీ
నేతలకు సూచించారు.

వివిధ వర్గాలకు ప్రభుత్వం నుంచి అందాల్సిన ప్రయోజనాలు, ఆర్థిక సాయం
పెండింగ్‌లో ఉన్నాయని ఆరోపిస్తూ గతంలో నిర్వహించిన ‘బాకీ
కార్డుల’ కార్యక్రమాన్ని మళ్లీ చేపట్టాలని కేటీఆర్‌ సూచించారు.
రైతులు, వ్యవసాయ కూలీలు, వృద్ధులు, మహిళలు, విద్యార్థులు, యువతకు
ఇచ్చిన హామీలను ప్రత్యేకంగా ప్రస్తావించాలని ఆదేశించారు.

ఒకే తరహా సభలు నిర్వహించకుండా ఆయా వర్గాల సమస్యల ఆధారంగా ప్రత్యేక
కార్యక్రమాలు చేపట్టాలని కేటీఆర్‌ సూచించారు. మహిళలు, రైతులు, యువత,
విద్యార్థులు, ఆటో డ్రైవర్లు, దళితులు, బీసీలు, గిరిజనులు, ప్రభుత్వ
ఉద్యోగులు, రిటైర్డ్‌ ఉద్యోగుల కోసం ప్రత్యేక కార్యక్రమాలు నిర్వహించనున్నారు.

ప్రతి వర్గం ఎదుర్కొంటున్న సమస్యలను గుర్తించి వాటిపై కార్యక్రమాల
రూపకల్పన చేయాలని పార్టీ నేతలకు సూచించారు.

యువతను లక్ష్యంగా చేసుకుని సోషల్‌ మీడియా వేదికగా వినూత్న ప్రచారాన్ని
నిర్వహించాలని కేటీఆర్‌ సూచించారు. డిజిటల్‌ కంటెంట్‌, కొత్త ప్రచార
విధానాలతో బీఆర్‌ఎస్‌ ఆరోపణలను విస్తృతంగా ప్రజల్లోకి తీసుకెళ్లాలని
పార్టీ సోషల్‌ మీడియా విభాగానికి దిశానిర్దేశం చేశారు.