హైదరాబాద్, ఆగస్టు 23 (నవజ్యోతి ప్రతినిధి):
కాంగ్రెస్‌ పార్టీలో అంతర్గత విభేదాలు మరోసారి బహిరంగ చర్చకు వచ్చాయి.
కొండా కుటుంబంపై తీవ్ర వ్యాఖ్యలు చేస్తూ ఎమ్మెల్యే నవీన్‌ యాదవ్‌
ప్రెస్‌మీట్‌ నిర్వహించారు. కాంగ్రెస్‌ పార్టీని, ప్రభుత్వాన్ని బలహీనపరిచే
ప్రయత్నాలు జరుగుతున్నాయని ఆయన ఆరోపించారు.

“కాంగ్రెస్‌ను బలహీనపరిచే కుట్రలో కొండా
ఫ్యామిలీ భాగం అవుతోంది. మేము ఉన్నంత వరకు మా ప్రభుత్వాన్ని ఎవ్వరూ ఏం
చేయలేరు” అని నవీన్‌ యాదవ్‌ అన్నారు.

పార్టీ ప్రభుత్వాన్ని బలహీనపరిచేలా ఎవరైనా వ్యవహరిస్తే కాంగ్రెస్‌ నాయకత్వం
కఠినంగా స్పందించాలని ఆయన డిమాండ్‌ చేశారు. వ్యక్తిగత విమర్శలు, బహిరంగ
ఆరోపణలు పార్టీ ప్రతిష్ఠను దెబ్బతీస్తాయని పేర్కొన్నారు.

కొండా కుటుంబంపై కాంగ్రెస్‌ క్రమశిక్షణా కమిటీ చర్యలు తీసుకోవాలని నవీన్‌
యాదవ్‌ కోరారు. “క్రమశిక్షణ లేని వాళ్లు పార్టీలో అవసరం లేదు.
ఒకరిద్దరి వల్ల పార్టీకి నష్టం జరిగితే ఊరుకోవాలా?” అని ప్రశ్నించారు.

కొండా సురేఖ వ్యవహారంపై కాంగ్రెస్‌లో అంతర్గతంగా వివాదం కొనసాగుతున్న
సమయంలో నవీన్‌ యాదవ్‌ వ్యాఖ్యలు ప్రాధాన్యం సంతరించుకున్నాయి. ఇప్పటికే
కొండా సురేఖ తనపై, తన కుటుంబంపై విమర్శలు చేస్తున్న వారి వెనుక ఉన్న
“అదృశ్య శక్తులను” గుర్తించి చర్యలు తీసుకోవాలని పార్టీ క్రమశిక్షణా
కమిటీకి లేఖ రాసినట్లు వెల్లడించారు.

ఈ నేపథ్యంలో ఒకవైపు కొండా సురేఖ వివరణలు, మరోవైపు పార్టీ ఎమ్మెల్యేల
బహిరంగ విమర్శలు కాంగ్రెస్‌లో పరిస్థితిని మరింత ఆసక్తికరంగా మార్చాయి.
క్రమశిక్షణా కమిటీ ఈ వ్యవహారంపై ఎలాంటి నిర్ణయం తీసుకుంటుంది?
బహిరంగంగా జరుగుతున్న విమర్శలకు పార్టీ అధిష్ఠానం ఎలా అడ్డుకట్ట వేస్తుంది?
అనేది ఇప్పుడు చర్చనీయాంశంగా మారింది.